Reportajen Silvino Freitas
Centro Nasional Chega (CNC) asina nota entendimento ho Organizasaun Naun Governamental BELUN, implementa rekomendasaun Chega! nian kona ba estadu hamutuk ho sosiedade sivíl garante promosaun ba direitu umanu, liuliu seguransa pesoál ba ema idak-idak.
Diretór Ezekutivu CNC, Hugo Fernandez hateten selebrasaun ba nota entendimentu ne’e halo ho BELUN ne’ebé iha esperiénsia naruk ho sira nia koñesimentu tomak, iha aspetu promove no próteze ema nia direitu.
“Ita hotu hatene durante ne’e BELUN servisu iha prevensaun konflitu nian, entaun ho esperiénsia ne’ebé iha no kapasidade esperiénsia CNC no BELUN iha, nune iha tinan kotuk no tinan ida ne’e ita kontinua koopera servisu hamutuk” dehan Diretór Ezekutivu CNC Hugo Fernandez iha Balide,(22/04).
Nia dehan tan katak iha tinan ida ne’e asina akordu atu servisu iha area seguransa nian, nunee sidadaun sira bele seguru iha sira nia moris atu asesu ba rekursu natureza ne’ebé iha, seguru hodi ezerse nia direitu fundamental sira, no seguru iha konflitu ne’ebé mosu iha sira nia komunidade rasik.
“BELUN iha nia esperiénsia no programa sira kona ba alerta sedu ba konflitu ruma ne’ebé akontese iha sira nia sosiedade, no mos halo monitorizasaun ba potensia konflitu ne’ebé akontese no sira halo rekomendasaun ba oinsa atu prevene konflitu” nia dehan.
Iha fatin hanesan Diretor NGO BELUN, Luis Ximenes hateten BELUN iha nia sistema ida naran responde-sedu ne’ebé foku liu ba monitorizasaun ba dadus insidente sira ho mos intervensaun ba atividade dame ne’ebé hahu ona implementasaun iha inisiu tinan 2009 too mai agora.
“Iha priviléjiu boot ba BELUN tanba hetan konfiansa hosi Chega iha tinan kotuk no tinan ida ne’e iha atividade implementasaun monitorizasaun ba hatan no kontribui ba rekomendasaun relatóriu Chega nian rasik” dehan Luis Ximenes Diretor NGO BELUN iha CNC Balide,(22/04).
Nia dehan tan katak atividade hosi programa sira hanesan dialogu komunitariu formasaun sira ne’e sei implementa iha munisipiu sira ne’ebé idantifikadu maka Ainaro, Covalima, Manufahi no Bobonaro.
