Reportajen David da Costa Gusmao
Sekretáriu Estadu Juventude e Desportu (SEJD), Abrão Saldanha Nokosiku dehan iha tinan ida ne’e kontinjente atleta Timor-Leste nian hamutuk 38 atleta, atu ba kompete iha jogu sudeste aziátiku iha SEA Games iha Vietname.
“Tinan ida ne’e ita nia reprezentante Timor-Leste nia partesipasaun hamutuk atletas 38, kompostu husi modalidade atletizmu, taekwondo, Boxing, natasaun karatedo, hit besi, no futeból ,” dehan Sekretariu Estadu Abrão bainhira halo Seremónia despedida ba kontinjente Atleta no Ofisial sira ne’ebé sei partisipa iha Jogus Sudeste Aziátiku nian, iha Vietname 2022 (SEA Games 2022), iha Palásiu Governu, Kinta, 5/05.
Nia haktuir atleta agora 25 ne’ebe iha ona Vietname liuliu modalidade Futeból nian, tanba sira iha jogu ne’ebe maka preparasaun iha rai liur. Sira halo iha malayzia no rai sira seluk no sira agora dadauk iha sira hamutuk 13, maka atu sai ho ofisial no treinadór sira.
“Atleta sira ne’ebe agora sai daudauk ne’e, selesionadu hosi kampionatu nasional ho liga nasionál, maka selesiona ba melores sira, ne’ebe maka ita halo iha ita nia rai laran, para nune’e kompete ho dignidade atu reprezenta ita hotu nia orgullu,” nia esplika.
Iha fatin hanesan Primeiru Ministru (PM), Taur Matan Tuak husu obrigadu ba Sekretáriu Estadu Juventude e Despostu, tekniku no treinadór sira, tanba bele treinu joven sira, no suporta ona sira hodi bele ba tuir SEA Games, no reprezenta Timor-Leste iha Vietname.
“Ha’u sente kontente tebes, bainhira rona dehan ita kompete iha SEA Games ita boot sira hatene ita ukun an tinan 20 ona, entaun ha’u hanoin tempu ona para ita atu kompete, naturalmente kompetisaun ida ne’e kuandu ita dehan kompete ne’e signifika, treinu no investimentu, treinu investimentu no kualidade ne’e importante los, entaun ha’u kontente tanba halo selesaun no sai di’ak liu entre di’ak liu,nune’e bele tuir kompetisaun iha ASEAN games iha Vietname,” hateten PM Taur.
