Reportajen David da Costa Gusmao
Primeiru Ministru (PM) Taur Matan Ruak husu ba atleta sira ne’ebe sei partisipa iha SEA GAMES 2022 iha Vitename, atu nafatin rona treinadór ne’ebé responsavel ba sira, atu bele susesu iha kompetisaun SEA GAMES ne’e.
“Nafatin rona ita nia treinadór sira, no responsavel sira ne’ebé akompaña imi, ne’e imi nia aman,imi nia maun, sira sei tau matan ba imi, sira hakarak imi iha susesu, ita iha susesu, nasaun iha susesu, tanba imi ba reprezenta ami tomak, 1.5 Milloens habitantes, imi hanoin took, ne’e la’ós ema uitoan, sira balun imi lakon sira tanis, signifika saida, sira silu liman ba imi, tanba ne’e tenke hanoin ida ne’e,” Dehan PM Taur, Iha palásiu governo, bainhira partisipa iha Seremónia Despedida ba Kontinjente Atletas no Ofisias sira ne’ebé sei partisipa SEA GAMES 2022 iha Vietname, Kinta 5/05.
Xefe Governu ne’e esplika katak, uluk sei Prezidente Republika, atleta balun ba tuir kompetisaun ne’e lakon. Treinadór sira koalia katak aleta sira ne’e kalan halai lakon, balun hadeer fali deit no joga istamina laiha hotu.
Tanba atleta sira ne’e reprezenta Timor-Leste, tanba ne’e boa sorte, aluta kontinua, i labele haluha halo esforsu másimu, espera sei bele lori Timor ho di’ak liu iha kompetisaun.
“Ha’u espera imi iha dezempeñu di’ak, Ha’u fiar imi reprezenta Timor-Leste ho di’ak liu, ha’u reza ba imi, no ita nia matebian sira tulun nafatin imi, la’ós de’it iha Viajen maibé mós durante jogos sira, too imi fila fali ho isin di’ak no susesu. ami la ezije, la husu atu halo liu buat ne’ebé imi bele, mai ida ne’ebe imi bele ami tenke ezgota hau fiar ida ne’e,” dehan Taur
