Reportajen David da Costa Gusmao
Prezidente Republika (PR) eleitu, Dr. Jose Manuel Ramos Horta hateten funu iha Ukránia impaktu boot ba iha ekonomia mundiál, inkluindu Europa, impaktu daudaun ona mai Timor-Leste, entaun Prezidente eleitu foun, preokupa ida ne’e.
“Funu iha Ukránia impaktu boot ba iha ekonomia mundial no inkluindu ba europa, i impaktu dadaun ona ba iha Timor-Leste, entaun ida ne’e maka nu’udar sidadaun no Prezidente eleitu, ida ne’e hau nia preokupasaun numeru un,” dehan Prezidente Eleitu Jose Ramos Horta bainhira ramata hasoru malu ho Primeiru Ministru Taur Matan Ruak, iha Palaciu Governu, Kinta 5/05.
Ho ida ne’e fahe ba lider hotu, oinsa bele serbisu hamutuk, kolabora instituisaun sira no parseriu sira, para iha rai ida ne’e labele ema ne’ebe kiak tiha ona, kiak liu tan tanba folin sasan sae iha merkadu laiha diskusaun buat sira ne’e, oinsa maka bele evita kosok-oan sira, inan sira isin rua iha alimentasun di’ak
“Preokupasaun numeru un mak situasaun umanitária ne’ebe komesa todan mai ita, seidauk aat hanesan rai seluk,” dehan Horta
Prezidente eleitu ne’e haktuir iha Shanghai governu Xina komesa halo lockdown ona iha portu Shanghai, portu ne’ebe maior iha mundu maibe seidauk haree konsekuénsia total, maibe fulan rua tolu tan bele dezastre boot ba Timor-Leste.
“Tanba ne’e maka hau koalia ho Primeiru Ministru, Prezidente, Maun boot Xanana, hau sei reuniaun ho sistema Nasoens Unidas tomak, depois lori fali ideas sira ne’e, buat ruma maka sei iha karik bele lori ba Parlamentu”, nia konklui
