Reportajen David da Costa Gusmao
Governu liuhosi reuniaun Konsellu Ministru iha Segunda ne’e, aprova ona mós projetu Dekretu-Lei ida, ne’ebé aprezenta husi Ministru Administrasaun Estatál, Miguel Pereira de Carvalho, kona-ba programa Uma ba Ema Kbiit Laek Plus (UKL+).
“Projetu Dekretu-Lei ida-ne’e hetan ona aprovasaun iha sorumutu Konsellu Ministru iha loron 06 Maiu 2022, maibé tanba alterasaun balun mosu iha faze redasaun finál nian, tenke submete fali ba Konsellu Ministru atu aprova,” Ministru Prezidénsia Konsellu Ministru, Fidelis Manuel Leite Magalhães informa ba jornalista sira hafoin reuniaun Konsellu Ministru Estraordináriaáriu iha Palásiu Governu, segunda 9/05.
Nia haktuir iha Dekretu-Lei ida-ne’e estabelese rejime espesiál aprovizionamentu ne’ebé haree liu ba ezekusaun medida UKL+. Ho rejime foun ida ne’e ba oin sei prevee opsaun rua, opsaun ida maka atribuisaun subvensaun liuhosi estrutura suku programa Nasionál Dezenvolvimentu Suku (PNDS), no ida seluk ho posibilidade atu halo aprovizionamentu sentralizadu, hodi bele hetan ekonomia eskala no poupansa ba rekursu ekonómiku.
“Programa ne’e ho objetivu atu hadi’a kondisaun sira abitalidade husi uma ne’ebé sai nu’udár hela-fatin permanente ba uma-kain sira ne’ebé vulneravel liu, bainhira uma sira ne’e aat hela no uma-kain sira ne’e la iha uma seluk atu hela ba. Uma-kain ne’ebé vulneravel liu, iha kontestu ezekusaun programa UKL+, maka sira ne’ebé ninia rendimentu médiu loroloron la liu dolar amerikanu 1, 25 (dolar amerikanu ida no sentavu ruanulu resin-lima) no ne’ebé sira-nia uma ne’e aat hela,” dehan Fidelis.
Nia esplika uma-kain ne’ebé vulneravel liu, bele benefisia tuir modalidade apoiu sira hanesan apoiu finanseiru ba obra benefisiasaun, konservasaun ka reparasaun husi ninia hela-fatin, to’o valor másimu dolar $ 13000 mill
Nune’e apoiu mós materiál sira konstrusaun nian ba substituisaun materiál sira kobertura no revestimentu husi ninia hela-fatin, to’o valór másimu dolar us $ 4000 mill.
