Reportajen David da Costa Gusmao
Primeiru Ministru (PM) Taur Matan Ruak informa, ohin hahú halo lansamentu fatuk dahuluk nian, ba Konstrusaun Timor Marina Square (TMS) no lansamentu fatuk dahuluk husi kompleksu ne’e sei sai hotel, komérsiu no apartamentu sira Timor Marina Square nian.
“Tanba ne’e, ho ksolok no satisfasaun boot, ohin loron ha’u partisipa iha serimónia lansamentu fatuk dahuluk nian ba Konstrusaun Timor Marina Square, ne’ebé konkretiza prioridade sira nasaun nian iha prátika no iha posibilidade hodi kumpre objetivu nasionál sira ida ne’ebé boot, ho projetu privadu ida, ne’ebé finansia husi fundu internasionál sira ne’ebé posibilita aparesimentu operadór ekonómiku foun ida iha setór turizmu nian,” dehan PM bainhira halo nia diskursu iha lansamentu TMS iha Antiga Rezidensia Abo Xavier do Amaral, Lecidere, Tersa 17/05.
Nia haktuir serimónia ida ne’ebé marka inísiu husi prosesu ida ba reabilitasaun urbana ne’ebé sei hala’o iha área importante ida-ne’e iha Largo Lecidere, ho infraestrutura foun ida ne’ebé moderna, efisiente, sustentavel iha nivel ekonómiku no ambientál.
“Sei disponibiliza la’ós ba de’it servisu foun sira ba ita-nia sidadaun, turista, investidór no emprezáriu sira ne’ebé vizita ita, liuhusi otél, restaurante, estabelesimentu komersiál no apartamentu sira, maibé mós oferta oteleira sira nasaun nian ne’ebé di’ak no kualidade servisu nian sira ne’ebé fó ba ita-nia utente sira,” nia esplika.
Iha Projetu ida ne’e marka ritmu kreximentu no progresu nian ne’ebé dezeja ba nasaun, ho inovasaun barak liu, kriatividade barak liu, empreendedorizmu privadu barak liu, hodi estimula aparesimentu jerasaun trabalhadór foun ida ne’ebé kualifikadu no operadór ekonómiku sira.
“Investimentu ida ne’ebé kontribui duni ba objetivu boot sira Governu nian no ne’ebé mak ezije husi ita-nia sidadaun sira, liu-liu joven sira, ne’ebé buka oportunidade foun sira kona-ba formasaun no empregu nian, ne’ebé bele hasae ninia abilitasaun no kompeténsia sira, nomos fonte sira rendimentu nian, moris-di’ak no kualidade moris nian,” Tenik Taur.
Iha fati hanesan Diretór Ezekutivu CEO hosi Empreza “A-Smart Holdings Ltd”, Lim Huan Ching espresa ninia gratidaun profundo ba Governo Timor – Leste nia esforsu no dedikasaun tomak ne’ebé ohin loron bele realiza lansamento fatuk dahuluk ba projeto konstruksaun Timor Marina Square ne’e iha Timor-Leste.
” Ami kontentente Tama Governo Timor – Leste bele simu ami atu investe iha Timor, ho Timor-Leste nia natureza nia furak, riku ho kultura no karateristiku ema Timor nia servisu maakas, Ita fiar katak potensialidade ba projetu ida ne’e sei realiza mehi Timor-Leste nian,” nia hateten.
Entertantu iha projeto Timor Marina Square Ida ne,e sei konstrui durante fulan 30 nia laran ho orsamento 50 millaun.
