Home EduTek Fakuldade Agrikultura – UNTL Hala’o Judísiu ba Estudante Finalista 57 Hosi Departamentu...

Fakuldade Agrikultura – UNTL Hala’o Judísiu ba Estudante Finalista 57 Hosi Departamentu 4

122
0
UNTL Hala'o Judísiu ba Estudante Finalista 57. [Foto: Adroaldo | 27.05.2022]

Reportajen Adroaldo “Saretuka”

Universidade Nasional Timor Lorosa’e (UNTL) nia Fakuldade Agrikultura hala’o serimónia judísiu ba dala-XXVI ba estudante finalista 57 hosi Departamentu Agronomia, Agro Sócio-Economia, Agro Pecuária no Saúde Animal ho tema ‘Ho Siénsia ne’ebé kle’an bele garantia dezenvolvimentu agrikultura ba autosufisiénsia, seguransa alimentar no bem-estar nasional’, ne’ebé hala’o iha Salaun Delta Nova, Kinta (26/05).

Iha diskursu, Dekanu Fakuldade Agrikultura, Professor Doutor. Vicente de Paulo Correia hato’o agradese boot ba inan-aman no família sira ne’ebé fo fiar ona ba Fakuldade Agrikultura, UNTL, hodi hala’o estudu iha Fakuldade refere to’o susesu, ida ne’e fiar ida ne’ebé boot tebe-tebes.

“Ohin Fakuldade Agrikultura hakat tan pasu ida hodi produs 57 pessoas iha área agrikultura, nune’e ita espera katak sira bele kontribui signifikante ba dezenvolvimentu seitor agrikultura,” dehan Dekanu Fakuldade Agrikultura iha nia diskursu ba judisiáriu sira, iha serimónia solene ne’ebé hala’o iha Salaun Delta Nova ne’e.

Nia hatutan ohin judisiáriu sira hetan ona títulu akadémiku no ne’e susesu boot ida, nia dehan atu hetan títulu refere la’os buat fasil ida, tanba inan-aman sira nia esforsu oin nusa mak bele alkansa oan sira nia estudu.

“Saída mak sira investe, saída mak sira haka’as aan durante ne’e, ohin ita hamutuk iha ne’e atu asiste sira ne’ebé mak ita boot sira investe, susesu duni iha sira nia estudu,” hato’o Dekanu ba judisiáriu sira hodi apresia inan-aman sira nia esforsu no investimentu ne’ebé la saugati, ikus hetan susesu.

Dekanu dehan haree ba graduadu sira iha pasadu, sira hahú harii grupu iha Aileu, Watulari, Maliana hodi tenta produs buat ruma iha ita nia rai laran, maibé as vezes problema ne’ebé ita hasoru iha kapital, estudante sira susar tanba sira iha espesialidade, iha buat hotu maibé susar atu investe iha matenek ne’ebé sira iha tanba problema ho fundu.

“Problema seitor agrikultura ne’ebé durante ne’e ita hasoru 20 anus, ita hatene katak produsaun menus, merkadu la iha, folin be tuun, fos be importa nafatin hosi rai li’ur ne’e problema klásiku ne’ebé ita hasoru to’o agora seidauk iha solusaun, ne’ebé ne’e dezafiu ne’ebé ita hasoru, mais ha’u fiar ho koñesimentu hosi judisiáriu sira ne’ebé agora da-dauk tuur iha ne’e, ha’u hanoin ita bele ultrapasa dezafiu sira ne’e balu, la hotu mais pelu menus ita provoka mudansa ne’e oi-tuan oi-tuan,” dehan Dekanu Vicente.

Iha parte sorin, breves palavras ba judisiáriu sira, Reitor UNTL, Professor Doutor. João Soares Martins hato’o nia parabéns ba judisiáriu sira ne’ebé tinan barak halo sira nia estudu, ikus mai bele susesu hetan sira nia títulu.

Reitor mos hato’o agradese ba inan-aman ne’ebé durante ne’e esforsu hodi fo susesu ba oan sira sira, nune’e mos profesor sira nia dedikasaun durante ne’e orienta estudante sira iha sira nia prosesu estudu.

Nune’e reitor João enkoraja mos judisiáriu sira wainhira atu iha inisiativa boot liu tan hodi harii grupu entre estudante sira atu nune’e kria agro negósiu ba produtu iha ita nia rai laran.

“Se ita bele brani investe ita nia matenek, investe ita nia vontade tomak, ha’u nia hanoin ita Timor bele self-sufficient en termue de produtus agríkolas iha Timor laran” Reitor UNTL enkoraja judisiáriu sira.

Reprezenta judisiáriu, Abelita Pinto iha nia diskursu hato’o nia obrigadu wa’in ba estrutura universidade tomak ne’ebé durante ne’e fasilita iha prosesu estudu, ba dekanu no estrutura tomak ne’ebé durante ne’e fasilita mos estudante sira hotu, nune’e mos ba profesores sira ne’ebé dedika sira nia aan, fahe matenek ba estudante sira to’o susesu hetan sira nia títulu molok sai hosi universidade. Nia hato’o mos nia lian agradesimentu ba inan-aman sira hotu nia domin no dedikasaun ba oan sira.

“Agradese mos ba ami nia domin ba inan-aman, ba imi nia sakrifísiu ba ami hotu. Klaru katak judísiu ida ne’e la’o rohan ba ami nia konkista, maibé ami fiar ho judísiu ida ne’e hanesan enxada no katana ba susesu hodi atribui domin ba ami nia inan-aman,” dehan Abelita.

Nia hatutan ho judísiu ida ne’e estudante sira prontu fila hikas ba komunidade hodi kontribui siénsia sira mak hetan ona durante banku estudu. Nia akresenta ida ne’e la’os rohan maibé tuir mai sei iha etapa foun ne’ebé sei hasoru hodi kontribui ba komunidade liu hosi siénsia agrikultura.

Print Friendly, PDF & Email

LEAVE A REPLY

Please enter your comment!
Please enter your name here