Home Analisa Halekar Lixu Arbitraria Impaktu Hamosu Moras Dengue

Halekar Lixu Arbitraria Impaktu Hamosu Moras Dengue

258
0
Filipio Marques de Jesus. [Foto: Dok. Privadu | 02.06.2022]

Hakerek nain Filipio Marques de Jesus

Introdusaun

Molok ezisténsia pandémia Covid-19 iha Timor-Leste maibé, antes ne’e moras Dengue hahú fo amesa maka’as ba sosiedade liu-liu ba labarik minoridade sira iha territoriu laran tomak. Depoiz de estadu Timor-Leste kumpri ordem husi (OMS) hodi dekreta Estadu Emerjensia(EE) iha momentu hanesan pursentu% ba moras Dengue aumenta durante tinan ha’at ikus ne’e.Moras kontajioza refere hamate ona labarik ki’ik iha Timor-Leste.

Anunsiu Dadus Estatistika Nasional Husi Ministeriu Saude(MS) hatudu katak kazu ne’ebè registradu ba moras dengue kada tinan  aumenta maka’as hahu husi 2018-2022. Tanba iha Tinan 2018 total afetadus hamutuk 330, 2019 total 973, 2020 total 1000, iha 2021 total 1,050, Dili, 26 Marsu 2022 (TATOLI) rejistradu pasienti fulan-janeiru 3.591. Signifika kazu sa’e automatikamente. Husi indikadores hirak ne’e hamate ona ema na’in 10 husi 2018-2021 no 2022 hamate ona 44 óbitu, liu-liu ba labarik sira ho idade tinan 5 mai kraik tuir kazu ne’ebè registradu husi pasientes ne’ebé transferensia husi munisipiu sira hanesan: Ermera, Dili, Liquiça, Manatuto, Covalima, Ainaro,Aileu, Lautem, RAEOA,   Bobonaro, Baucau, Lospalos, Manufahi, Viqueque.”

Dengue moras kontajioza ne’ebé transmite husi susuk (aedes aygipti no aedes alboptictus). Susuk refere dalabarak fasil liu sira moris husi ambiente ne’ebé fo’er, du’ut no nakonu ho bee hanesan: bee dalan, bee nalihun, bee ne’ebé iha botir, kalen, masa, roda a’at, aqua, vazu, no fatin sira ne’ebé fasil atu bee nalihun perigozu ba tempu udan. Ho nune’e atu evita susuk sira labele moris maka estratejikamente obrigadu tenki evita atravez kontrola be’e iha fatin sira ne’ebé mensiona iha leten. Alende kontrola bee nalihun sira Orgaun Estadu tenki prepara fasilidade sira hanesan Ai-moruk Abate  hodi hamate Larva iha bee nalihun ne’ebé besik komunidade nia hela fatin.

Atu análiza ba total numeru registradus husi moras Dengue katak, Orgaun Governu liu-liu ba Ministeriu Saùde la toma atensaun seriu no adekuadu hodi prepara fasilidade ba hamate larva, la halo sosializasaun ba komunidade, la dezamina informasaun maka kada fulan susuk sira aumenta no sei implika bo’ot ba saùde labarik ki’ik sira nian. Husi kestaun sira ne’ebé mosu nia abut fundamental ne’e husi aktus soe lixu arbitraria atrávez sidadaun sira ne’ebé konsiénsia menus atu organiza a’an koloka lixu iha nia fatin sira ne’ebé governu prepara ona. Tanba nia impaktu husi soe fo’er arbiru fó espasu ba susuk sira atu moris no nia tolun aumenta nia produtividade, normalmente transmite nia a’an ba komunidade liu-liu ba labarik sira ne’ebé halimar iha fatin publiku sira ne’ebé kontamina husi bee fo’er ne’ebé nalihun fasil susuk moris ba. Sidadaun sira ne’ebé halibur malu iha familia, no komunidade pelo kontrariu sira laiha gestaun ba lixu atu ordena hodi ba soe iha nia fatin no tuir oras ne’ebé determina ona maka foer sira ita la rezolve no nia fo biban ba susuk sira atu moris ba bei-beik.

Relasiona ho diskusaun no implementasaun politíka publika hirak refere iha nasaun laran husi governantes sira nu’udar reprezentante povu ba rezolve lixu nia mekanizmu no orientasaun frazil tebes tanba la reduz lixu maibé aumenta kada loron. Ne’e difikuldade seriu ba estadu atu hola medidas foun ba responde no trava susuk sira labele moris tan no lori moras ba labarik minoridade sira.

“Husi situasaun real hirak ne’e deskreve mós iha Konstituisaun (RDTL), Artigu 61(meiu ambiente) Nu. 1 hatete katak: ema hotu-hotu iha direitu atu bele moris saudavel no Ekologikamente atu moris iha Ambiente ne’ebé mak mòs no iha dever atu proteze no hadia ba nia benefisiu agora no ba futuru jerasaun nian. No mòs Governu Timor-Leste kria servisu Pesoal Limpeza Esgotu(PLE), ne’ebé kada loron ekipa husi saneamentu sira sempre tuun ba fatin sira atu raut no hamoos, bazeia ba Dekreitu Lei no 33/2015 hateten katak: wainhira sidadaun ida soe foer la tuir nia fatin ka la tuir oras ne’ebè mak iha hahu husi 4:00-7:00 se kuandu liu husi oras ne’ebè mak termina ona sei hetan sansaun no multa osan ho total 1 dolar to‘o 50 dolares.” Iha sorin seluk

“Haktuir iha Deklarasaun Universal Direitus Umanus iha artigu 25 Nu.2 hatete katak: inan no labarik sira iha direitu atu hetan tratamentu no tulun espesial. Labarik hotu-hotu husi oan kaben ka laos oan kaben tenki hetan protesaun sosial ne’ebè hanesan. Organizasaun Internasional World Health Organization (WHO), depoiz de Segunda Guerra Mundial Konstituisaun WHO (1946) deklara katak “ema umanu hotu-hotu iha direitu fundamental atu goza nivel saùde ne’ebè a’as liu hotu. Depoiz ita nia nasaun ratifika no aplika mòs iha ita nia nasaun ne’ebè preve iha Konstituisaun RDTL artigu 57 konaba (Saùde)Xefe Governu Primeiru Ministru Sr. Taur Matan Ruak” ho nia inisiativa voluntarismu hodi implementa servisu limpeza iha sidade  dili laran “fulan ida dala ida no akontese iha loron sexta fim do mês” servisu limpeza ne’e nakloke ba pùbliku no ba sidadaun ka instituisaun sira.”

Atu analiza katak politikamente hare ba lei no programa husi Autoridade sira mesak furak depoiz interesante tebes atu aplika na realidade implementasaun la kondiz ho normas legais sira, tamba komunidade sira kontra tiha regulamentu hirak hotu. Observa iha terenu hatudu katak depoiz de estabelese dekreitu lei refere orgaun relevante la halo monitorizasaun no sosializasaun para hodi buka hatene nia efektividade sira. Governu liu husi ministeriu relevante falta dezaminasaun informasaun ba komunidade sira konaba impaktu negativu husi soe lixu ba komunidade ne’ebé hela dok husi estrada publiku, hela iha mota ninin, tasi ibun, no valeta sira atu koloka lixu tuir nia fatin, Iha parte seluk komunidade sira hela ba laiha fatin atu soe lixu no lixu ne’ebé governu prepara la besik komunidade, Implementasaun ba lei sobre gestaun lixu no programa politika sira atu reduz lixu ladun seriu hodi sidadaun sira kontra regras no programa hirak ne’e,Falta konsiensia husi sidadaun sira atu tau lixu iha nia fatin.

Oinsa Politika Governu Implementa Gestaun Lixu Ho Diak Hodi Garante Ambiente Mós Atu Evita Susuk Labele Moris?

Tamba Sa Moras Dengue Kada Tinan Aumenta Bei-beik no Afeta Ba Labarik Minoridade Sira Nia Saude? 

 “Tuir Sientista (Thomas R. Dye iha 1972) hatete katak: whatever government choose to do or not to do. Saida deit maka governu deside atu halao ou la halao. Tuir Peritu (William N. Dunn) hateten katak: A Public policy is the answer to a problema perceived as public. Politika Publika ne’e hanesan resposta ida hodi hatan ba problema ne’ebé publiku infrenta.”

Pensamentu kritiku husi espertu rua ne’e sira hatete katak problema hotu-hotu ne’ebé sosiedade infrenta iha baze nia responsabilidade moral ne’e husi estadu tamba povu depozita sira nia konfiansa masimu ba sira atu halao kna’ar em nome do povu.

“Tuir Chandler dan plato (1988) hatete katak: Politika publika ne’e uza ho strategia rekursus humanus ne’ebé iha hodi rezolve problema publika. Politika publika hanesan mós intervensi ne’ebé halao ho kontinuasaun husi goveruo tamba interese grupu ne’ebé menus sorti iha populasaun, nun’ee sira bele  moris, no partisipa iha dezenvolvimentu ne’ebé iha.”

Kuiñesimentu husi Chandler nian ne’e atu esplika katak ema ne’ebé tuur iha estadu tenki iha rekursu umanu ne’ebé diak atu assume kargu ho kapasidade diak hodi konstrui sosiedade ida edukadu respeita ba valor demokrasia katak ukun mai husi povu, hamutuk ho povu, fila fali ba povu ida ne’e, tamba nia bele sistematikamente fornese rezultadu ne’ebé proporsional.

Halo analiza ba esplikasaun sira husi matenek nain tolu iha leten maka hakerek nain atu konklui katak problema sosial sira ne’ebé surge iha sosiedade nia kompetensia tomak ne’e iha estadu liu-liu orgaun ezekutador sira tamba sira maka prepara planu no orsamentu ligadu ho kondisaun moris sidadaun nian. Tamba tuir siênsia hetan esplikasaun katak politika publika hanesan planu estratezia husi individu sira ne’ebé halibur malu  iha organizasaun nivel a’as ho objeitivu ida ba interese nasional.

Konkluzaun

Atu konklui katak saude ema nia nian liu-liu labarik minoridade importante tebes atu kuidadu iha familia, komunidade, no nasaun tamba labarik mak rekursu ba destinu nasaun nian. Ho nune’e hanesan sidadaun mai ita habo’ot ita nia konsiensia hodi hamos ita nia uma-laran, ita nia bairu, ita nia aldeia no suku atu hadok a’an husi transmisaun moras Dengue ba ita nia oan sira. Husu mòs ba Governu liu-liu ministeriu relevante Ministeriu Saùde atu monitorizasaun no dezamina informasaun labele iha de’it Kapital sidade no Munisipiu sira maibe, presiza buka alternativu ba to’o iha area-rurais sira liu-liu ba fatin sira ne’ebè fasil halibur be’e-foer no susuk moris ba atu lalais evita susuk labele moris. No husu mòs ba Ministeriu Saùde atu serbisu hamutuk ho autoridade lòkal sira atu espalha informasaun ba nia emar sira iha sira nia komunidade horik ba. Alende ne’e husu mòs ba Diresaun Meiu-Ambiente atu fortifika dekreitu lei ba regulariza jestaun lixu iha Kapital Sidade Dili, inklui implementa mòs iha Kapital Munisipiu no area sira ne’ebè fasil atu susuk moris ba.

Bazeia ba parte dahuluk to’o mai parte ikus nian hakerek nain hakarak rekomenda ba governu atu mantein kontrola sidadaun sira atu labele estraga ambiente, tamba ambiente saudavel no beleza signifika halakon no evita susuk labele aumenta. Rekomenda mós ba ministeriu saude atu preve programa no  orsamentu ho balansu ba programa espesifiku hodi sosa aimoruk, hodi hamate larva sira iha be’e laran. Ba sivitas akademikas sira hotu hola medidas hanesan kontrolu sosial no agenti transformadora atu nafatin halo peskiza ba programa governu atu ezekuta ho loloos tuir duni programa ne’ebé aprova ona.

*(Filipio Marques de Jesus, Departamentu Polítika Públika, Fakuldade Siensia Sosiais, Universidade Nasional Timor Lorosa’e (UNTL) 2022, Ntl:75929896. Emaill address:filipiomarques@gmail.com. Fb:Marques Boanerges)

Print Friendly, PDF & Email

LEAVE A REPLY

Please enter your comment!
Please enter your name here