Home Notisia Suku Loi-Huno Ossu Simu Ona Komputadór no Printer husi Governu Fasilita Serbisu...

Suku Loi-Huno Ossu Simu Ona Komputadór no Printer husi Governu Fasilita Serbisu Suku nian

283
0
Xefi Suku Loi-Huno, Miguel da Costa Melo. [Foto: Santy | 16.06.2022]

Reportajen Santina Lucia da Costa

Suku Loi-Huno simu ona fasilidade husi Governu hanesan komputadór, printer no estapol hodi fasilita serbisu suku nian, bainhira povu sira mai trata dokumentu no garante katak, povu sira la ba tan ona print dokumentu iha rental privadu no la gasta tan ona osan, print gratuita iha sede suku.

Ba Neon Metin Xefe Suku Loi-Huno, Miguel da Costa Melo hateten fasilidade iha suku ne’e, foin lalais VIII Governu liuhusi Ministériu Administrasaun Estatál (MAE) fó ona laptop ida, printer ida ho Estapol.

Lider Komunitariu ne’e tenik katak durante ne’e povu sira mai trata dokumentu,  haruka sira ba ema nia rental privadu sira ba print iha ne’eba mak lori mai Xefe Suku asina.

“Dala barak sira mai husu deklarasaun oioin maibé ami sempre kestiona katak, fasilidade laiha, entaun ami fó de’it ezemplu deklarasaun mak sira ba rental print tiha mak lori mai Xefe Suku asina de’it, depois rejistu iha suku.” Dehan Xefe Suku Loi-Huno, Miguel da Costa Melo iha Suku Loi-Huno, Ossu, Viqueque, foin lalais ne’e.

Miguel da Costa Melo akresenta fasilidade ne’ebé fó husi MAE ne’e, garante katak, povu sira mai trata dokumentu ruma, hanesan Bom Komportamentu, deklarasaun suku nian, prontu bele print de’it ona iha suku, la presiza ona ba rental privadu hodi gasta osan.

“Ami mós la obriga povu sira selu bainhira halo deklarasaun ruma, ida ne’e ami nia serbisu ne’ebé tenki halo, prontu serbi ba ami nia povu, 24 oras ami sempre atende ami nia povu tanba povu mak hili ami. Agora dadaun komputer ne’e ami seidauk uza tanba, ami nia sede suku sei rehabilitasaun.” Hateten, Xefi suku Loi-Huno.

Nia mós husu ba MAE liuhusi Diresaun para fó treinamentu ba administrasaun suku nian, tanba durante ne’e uza manual (Mesing ketik) de’it, ne’ebé sira lahatene uza komputadór.

Print Friendly, PDF & Email

LEAVE A REPLY

Please enter your comment!
Please enter your name here