Home Notisia APFTL – SEJD Sosializa Programa Kompetisaun Hakerek Perfíl no Istória Foinsa’e Inspiradór

APFTL – SEJD Sosializa Programa Kompetisaun Hakerek Perfíl no Istória Foinsa’e Inspiradór

259
0
APFTL ho SEJD sosializa konaba hakerek istoria susesu foinsa'e. [Foto: Adroaldo | 17.06.2022]

Reportajen Adroaldo “Saretukau”

Alumni Parlamentu Foinsa’e Timor-Leste (APFTL) ho Sekretáriu Estadu Juventude no Desportu (SEJD) halo sosializasaun ba programa kompetisaun “Hakerek Perfil no Istória Foinsa’e Inspirador” ba individu, média eletrónika, uma produsaun, jornal no rádiu, hodi hakerek no produs vídeo ba foinsa’e susesu no inspirativu iha sira nia moris, ne’ebé bele inspira fila-fali ema ka joven sira seluk.

Abertura ba sosializasaun ne’e, Xefe Departamentu Promosaun Kriatividade Juventude, Elvis Almeida hatete, objetivu hosi programa ida ne’e mak oinsá SEJD liu hosi APFTL servisu hamutuk ho média online, imprime, inklui indivíduu sira ne’ebé iha interese ba hakerek istória foinsa’e inspiradór.

“Hanesan ita hatene, iha joven barak ne’ebé susesu iha sira nia karreira, maibé la hetan asesu, ema nunka hatene, entaun liu hosi média bele publika, para bele inspira fali foinsa’e sira seluk ne’ebé hala’o aktividade iha ida-idak nia karreira,” dehan Xefe Departamentu Elvis iha sosializasaun refere, ne’ebé hala’o iha Salaun Magna SEJD, sexta-feira, 17/06.

Nia hatutan atividade ne’e hala’o ba dala rua ona. Iha tinan kotuk hala’o ho média besik 20, maibé tinan 2022 ne’e la espera iha média no indivíduu ne’ebé barak mak interese partisipa kompetisaun ida ne’e, nia dehan ba hirak ne’ebé iha interese bele partisipa no submete nota konseitu antes hakerek istória inspirativu joven nian hodi publika iha média hodi inspira fila-fali joven sira iha territóriu tomak.

Iha fatin hanesan reprezenta APFTL ba sosializasaun ne’e, Cesar Ferreira Amaral esplika, mekanizmu hakerek istória ida ne’e diferente ho tinan kotuk nian, nia dehan tanba sá hakerek istória susesu joven sira nian, ida atu motiva foinsa’e hasoru dezafiu moris ida ne’e.

“Ida ne’e nu’udar meius ida, motiva fali ita nia kolega foinsa’e sira seluk, atu enfrenta dezafiu moris. Ita nia foinsa’e barak susesu iha sira nia karreira, sira rasik iha auto-empregu  i sira rasik kria empregabilidade ba sira nia maluk sira, maibé dala ruma ita la hateke hetan sira, entaun ita na’in hirak ne’e hamriik fali, hakerek fali istória ita nia kolega sira nian, para fo hatene ita nia kolega sira seluk katak ita joven sira barak mos iha mudansa, so ema seidauk hateke hetan,” dehan Cesar iha nia aprezentasaun iha Salaun Magna SEJD, 17/06.

Print Friendly, PDF & Email

LEAVE A REPLY

Please enter your comment!
Please enter your name here