Home Notisia APFTL Relata Pozisaun Halo Advokasia Iha Setór Edukasaun Ba Prezidente Repúblika

APFTL Relata Pozisaun Halo Advokasia Iha Setór Edukasaun Ba Prezidente Repúblika

105
0
APFTL hasoru malu ho Prezidente Republika, Dr. Jose Ramos Horta. [Foto: Media PR | 20.06.2022]

Reportajen Santina Lucia da Costa

Alumni Parlamentu Foinsa’e Timor-Leste (APFTL) hasoru malu ho Prezidente Republika, Dr. José Manuel Ramos Horta hodi relata sira nia pozisaun sira nian oinsa fó advokasia ba Governu iha setór Edukasaun, Empregu no Partisipasaun Siviku.

Hafoin enkontru, Prezidente APFTL, Zaulino Gomes da Silva, hateten,  halo audiensia ho Prezidente Republika koalia uituan kona-ba ezisténsia asosiasaun ninian tanba Prezidente Republika atual agora mak hahu kampaña kona-ba programa Parlamentu Foinsa’e nian.

Iha sorumutu ne’e APFTL informa asuntu rua ba Prezidente Republika kona-ba estudu ne’ebe sira halo iha tinan kotuk liuliu joven sira nia preferénsia, ba setór edukasaun, empregu,  no partisipasaun síviku.

“Ami partilha ho Prezidente Republika kona-ba joven sira nia preferensia ba Edukasaun, saida mak sira hakarak, sira hakarak estudu karik prefere liu ba Fakuldade ka siensia ne’ebe sira prefere.” Dehan, Prezidente APFTL, Zaulino Gomes da Silva ba Jornalista sira iha Palasiu Prezidensial Nicolau Lobato, Bairu-Pite, 20/6.

Tuir rezultadu ne’ebé APFTL  informa ba Prezidente Republika fó kontinuanidade para  halo advokasia hodi tulun Governu nia politika oinsa integra iha programa Governu ninian, oinsa mak influensia Orsamentu Jeral Estadu (OJE) para bele liga ba asuntu ninian, tanba dadus mos hatudu katak, joven 44% joven sira iha Ensinu Superior hili la tuir sira nia preferensia eskola ne’ebé sira eskola ba, Fakuldade sira ne’ebé sira hili ne’e la tuir sira nia hakarak.

Prezidente APFTL akresentaha relatoriu ne’e mos informa katak, estudante ka joven ninia preferensia ba Eskola Teniku Vokasional ne’e menus liu kompara ho Siensia Naturais ho Siensia Sosiais, sira prefere liu foti kursu Siensia Naturais duké foti Eskola Tekniku Vokasional, tanba sira seidauk hatene importansia husi Tekniku Vokasional.

Ida seluk mós APFTL informa ba Prezidente Republika kona-ba asuntu ida survei ne’ebé APFTL halo hela liga ho Internet, komportamentu labarik no adolxente  ba utiliza Internet.

Zaulino Gomes da Silva, Afirma, Ohin loron Governu halo kampaña kona-ba Internet Saudavél maibé ita laiha evidensia ruma atu bele ajuda Governu desidi politika ne’ebé lolos atu halo kampaña online ka internet saudavel mak oinsa.

Nia hatutan, APFTL iha relatoriu survei ida oinsa ajuda politika na’in atu lansa programa ida ne’ebé mak bele iha resposta ne’ebé kompletu. APFTL iha relatoriu ne’e mós hatudu katak, iha violensia online mós lubuk ida akontese iha ne’eba, abuzu online akontese iha ne’eba.

Aleinde ida ne’e mós APFTL informa serbisu seluk ne’ebé halo hela liga ba asuntu joven sira setór produtivu sira, liuliu setór Agrikultura ne’ebé joven sira halo ona, APFTL tulun oinsa ajuda halo advokasia ba ida ne’e.

Nia realsa tan katak, Estudu ne’ebé APFTL halo ho Grupu joven lubuk ida apoiu APFTL ida ne’e  hetan apoiu tekniku sira husi ita nia parseriu internasional sira hanesan UNICEF apoiu Monitoring ba Team, no apoiu mós husi SEJD oinsa finansia estudu, estudu sira ne’e uza hanesan evidensia politika na’in sira atu halo desijaun, sé ita iha politika la ho evidensia ne’e problema.

Hafoin enkontru, Prezidente Republika orienta kedas APFTL enkontru ho Asesór Prezidénsia Republika nian ne’ebé trata asuntu Edukasaun no Juventude para haree ninia kontinualidade para oinsa atu mobiliza rekursu halo advokasia para apoiu Prezidente Republika nia politiku ida oinsa tau OJE 20% ba setór edukasaun, la’os koalia orsamentu 20% ne’e de’it, maibé oinsa halibur dadus para bele iha informasaun natoon para ajuda  politika na’in sira, bele responsivu ba situasaun ne’ebe ita nia rain hasoru.

Print Friendly, PDF & Email

LEAVE A REPLY

Please enter your comment!
Please enter your name here