Home Notisia Planu IFC Sei Hasa’e Investimentu Iha Setór Turizmu no Agrikultura

Planu IFC Sei Hasa’e Investimentu Iha Setór Turizmu no Agrikultura

55
0
Ekipa Internasional Finance Corporation hasoru malu ho Prezidente Republka, Dr. Jose Ramos Horta. [Foto: Media PR | 23.06.2022]

Reportajen Santina Lucia da Costa

Ekipa Internasional Finance Corporation (IFC) Aprezenta Planu ba tinan oin nian ba Prezidente Republika Dr. José Manuel Ramos Horta. No planu tinan oin nian mak oinsa hasa’e investimentu iha setór privadu liuliu iha setór Turizmu, no Agrikultura.

Hafoin Enkontru, Reprezentante IFC iha Timor-Leste, David Freedman, hateten, ekipa kooperasaun husi International Finance Corporation (IFC) mai hodi aprejenta IFC nia planu ba tinan oin mai no mós atu simu hanoin husi Prezidente Republika.

“Planu oin mai mak ami hanoin oinsá bele hasa’e investimentu iha fatin setór privadu liu-liu setór Turizmu, Agrikultura no mós oinsá ita bele la’o nafatin projetu sira.” Dehan, Reprezentante IFC iha Timor-Leste, David Freedman ba Jornalista sira iha Palasiu Prezidensial Nicolau Lobato, Bairu-Pite, Dili, 21/6.

David Freedman, realsa, IFC nia serbisu la’o hela no atinji susesu lubuk ida, IFC haree ba tinan rua oin mai oinsá bele aselera serbisu ne’e la’o hela no oinsá bele hakle’an tan rezultadu.

“Servisu la’o hela ne’e mak IFC parseira ho KAIBAUK Institutu Finansas, atu koopera ho sira hodi fornese servisu finanseiru ba komunidade Timor Leste tomak, iha mós kooperasaun ho Ministériu Finansas (MF) no Ajensia sira seluk kona-ba projetu, Aeroportu Dili nian, sistema saúde nian no mós projetu reabilitasaun iha Hera.” Informa, Reprezentante IFC.

Nia dehan, IFC nia modelu la’ós katak iha orsamentu ne’ebé define uluk, IFC haree ba oportunidade investimentu, entaun servisu koopera hamutuk ho kompañia sira, setór privadu no mós Governu atu dezenvolve tan oportunidade atu aban bainrua IFC investimentu mós bele sa’e.

Nia hatutan, Liu husi kooperasaun ida ne’e la’ós IFC mak fornese finansiamentu ba komunidade, maibé IFC koopera ho KAIBAUK no mós fornese osan kapitál ba sira, depois sira emprestimu ba kliente sira iha nasaun tomak.

“IFC nia investimentu ho KAIBAUK liu ona $ 4.5 milloens depois KAIBAUK nia imprestimu fó ba kliente liu ona $14 milloens.” Nia Afirma.

Nia haktuir, Prezidente Repúblika, José Ramos Horta fó fiar ba IFC no nia husu IFC bele buka oinsá atu hasa’e tan investimentu iha setór estratejiku no oinsá bele mós koopera ho setór privadu husi rai-liur no mós husi rai laran nian.

Print Friendly, PDF & Email

LEAVE A REPLY

Please enter your comment!
Please enter your name here