Home Notisia Saky: Atu Kombate Hasoru Vísiu Polítiku, Presiza Kaer Fali Valores Pozitivu Rezisténsia

Saky: Atu Kombate Hasoru Vísiu Polítiku, Presiza Kaer Fali Valores Pozitivu Rezisténsia

134
0
Fundadór RENETIL no Eis-Sekretáriu DIGAREX no atuál Prezidente CCR, Carlos da Silva Lopes “Saky. [Foto: Santy | 22.06.2022]

Reportajen Santina Lucia da Costa

Iha loron moris Resistênsia Nacional dos Estudantes de Timor-Leste (RENETIL) ba dala 34, RENETIL organiza reflesaun nakloke ho tema RENETIL iha kombate hasoru visiu politiku sira: To’o iha ne’ebé ona? Hosi reflesaun refere kada membru RENETIL hato’o ninia prespetiva kona-ba oinsa membru ida-idak buka labele alimenta visiu ida ne’e iha Timor-Leste. Ba reflesaun ida ne’e, tuir Fundadór RENETIL no Eis-Sekretáriu DIGAREX no atuál Prezidente CCR, Carlos da Silva Lopes “Saky”, hateten atu dezmonta fila-fali vísiu sira ne’e, ita presiza kaer fali valores pozitivu sira ne’ebé kaer iha tempu rezisténsia nian, hodi kombate nafatin vísiu sira ne’e.

“Vísiu sira lori benefísiu ba ita, hanesan alimenta ita nia ego, lider sira nia boboot ita alimenta sira para fó pozisaun no projetu oan ruma ba ita, ne’e ita kontribui tiha ona alimenta konstrusaun visiu. Tan ne’e,  atu dezmonta fila-fali vísiu sira ne’e ita presiza kaer fali valores pozitivu sira ne’ebé kaer iha tempu rezisténsia nian hodi kombate nafatin visiu sira ne’e.” dehan Fundadór RENETIL Saky iha loron moris RENETIL, 20/6.

Saky hatutan ita presiza kombate hanesan membru RENETIL,  sé ita konsistente ho prinsípiu valores ne’ebé mak ita defende iha tempu rezisténsia ninian, hanesan mós organizasaun rezisténsia sira tomak, tuir loloos ne’e valores sira ne’e mak ita tenki kaer metin, mais dalaruma ita monu iha situasaun foun entaun valores sira ne’e ita husik hela tiha tanba ita buka konstroi fali.

Eis-Sekretáriu DAGAREX afirma, Kongresu RENETIL iha  rezolusaun dezde hahú husi Jakarta depois to’o mai iha extra ordinariu no ikus liu iha CCD ne’e ita hasai rezolusaun atu kombate duni visiu sira ne’e,  ne’eba temi ho klaru kedas oinsa kombate Saudenizmu, Infantelizmu, Narsizmu, Sigidizmu.

Nia esplika katak sigidizmu ho sigidista, segidores ne’e pengikut no sigidizmu ne’e penurut, rua ne’e lahanesan, Pengikut ne’e ema kritiku no penurut mak ema ne’ebé tuir de’it ne’e, hakruk tuir de’it. Agora ita atu kombate ne’e mak ida penurut de’it ne’e, la’os kombate ida pengikut ne’e.

“Sé ita koalia iha kontextu organizasaun ita kombate visiu sira ne’e, hanesan individu hau hanoin ne’e la fasil, imposivél mós organizasaun ida ba kombate fali visiu individu ida nian, mais nu’udar organizasaun nia tenki kombate visiu ne’e mós visiu ida ne’e husi grupu, organizasaun ka partidu ida nian, ida ne’e mak afeita ba sosiedade ninia moris ne’e, agora ita atu kombate mós organizasaun ba organizasaun ou Instituisaun ba Instituisaun.” Hateten, Saky.

Nia Akresenta, Uluk hahú ita nia ukun-an, ita hahú hanoin buat tolu importante tebes, koalia kona-ba konstrusaun estadu, konstrusaun nasaun ho konstrusaun paz, maibé iha konstrusaun seluk mak estraga tiha konstrusaun tolu ne’e, mak konstrusaun visiu.

“Ba hau konstrusaun Visiu  bele konstrui, tanba hanesan mós ema grupu kriminozu sira oinsa mak sira konstroe sira nia identidade, sira nia simbolu.  Ne’ebé visiu ne’e kuandu koalia ne’e ba buat negativu sira, visiu ne’e la’os buat pozitivu, hanesan kombate Alkohol, Fuma.” Nia realsa.

Nia dehan agora konstrusaun  visiu ne’e tanba saida?, visiu husi ema ida-idak nian lolos ne’e, ema balun la’os visiu boot sira ne’e ida, mais kuandu ema seluk alimenta ema nia ego entaun visiu ida ne’e mak sai organizadu tiha, sai instituisionalizadu tiha, entaun ida ne’e mak sai obstaklu ba hanoin boot sira ne’ebé mak ita halo por ezemplu hanesan, konstrusaun Estadu, Nasaun no ba paz.

Nia konklui odiu vigansa ne’e sai visiu ida ona, uluk tempu rezistensia laiha buat ne’e ida, ita hotu luta ba ukun rasik-an, divizionismu ho resionalizmu mos ita kombate. Mais to’o mai ukun rasik-an nia laran mak foin mosu fali visiu sira hanesan nee.

.

Print Friendly, PDF & Email

LEAVE A REPLY

Please enter your comment!
Please enter your name here