Home Notisia Banku Mundial: Ekonomia TL Fila Fali Ba Kresimentu, Presiza Mákina Foun Ba...

Banku Mundial: Ekonomia TL Fila Fali Ba Kresimentu, Presiza Mákina Foun Ba Kresimentu Sustentável

916
0
Banku Mundial lansa relatoriu konaba kresimentu ekonomia TL. [Foto: Adilson | 29.06.2022]

Reportajen Zevonia Vieira

Timor-Leste nia ekonomia naun-petrolíferu projeta atu aumenta 3.0 iha 2022, sustenta ho aumentu signifikativu iha despeza no investimentu governu nian, no mós rekuperasaun konsumu privadu nian ne’ebé hetan apoiu husi inísiu graduál loke fronteira sira nian. Aumentu presu hahán, kombustivel, no eletrisidade ne’ebé afeta husi funu iha Ukránia bele lori tempu naruk no bele fó impaktu ba prospetu kresimentu iha futuru, tuir edisaun Juñu 2022 Banku Mundiál nia Relatóriu Ekonómiku Timor-Leste.

Liuhusi komunikadu imprensa ne’ebe Neon Metin asesu relata katak Buffeta husi xoke rua husi COVID-19 no Siklone Tropikál Seroja, ekonomia naun-petrolíferu sa’e ho pursentu 1.5 iha tinan 2021. Orsamentu rejistu ho despeza besik porsentu 90 husi BIP reforsa konsumu governu nian. Pakote medida estímulu fiskál lubuk ida ne’ebé apoia empregu no rendimentu, hodi permite uma-kain sira mantein sira-nia gastu sira. Maibé, kresimentu ida ne’e mosu tanba resesaun iha 2017, 2018, no 2020 ne’ebé husik Timor-Leste nia Produtu Internu Brutu (PIB) ki’ik liu kompara ho tinan 2016.

“Ne’e pozitivu tebes tanba haree katak Timor-Leste fila fali ba kresimentu ekonómiku hafoin tinan hirak ne’ebé difísil tebes”, tenik Diretór Banku Mundiál Indonézia no Timor-Leste Satu Kahkonen.

“Maski projeta katak kresimentu sei kontinua iha taxa ne’ebé hanesan iha tinan 2023, inflasaun ne’e sei iha impaktu ba rekuperasaun iha tempu naruk. Reforma estrutura nian sira sei sai fundamentál tebes atu estabelese baze ba kreximentu ne’ebé diversifikadu no reziliente liu tán iha futuru.”

Tuir relatóriu ne’e, presiza estratéjia ida atu hatán ba dezafiu sira ba prazu badak no prazu médiu. Polítika fiskál tenke iha objetivu atu proteje ema vulnerável sira husi folin ai-han no kombustível ne’ebé sa’e, liu-liu liu husi asisténsia espesífika. Governu bele promove asaun polítika hodi hamenus presu ai-han liu husi aumenta produtividade agrikulturál no hasa’e nutrisaun liu husi diversifikasaun produsaun doméstiku.

Diversifikasaun ekonomia liu husi dezenvolvimentu seitór exportasaun importante ba kresimentu sustentável. Iha parte enerjia nian, efisiénsia husi jerasaun eletrisidade nian no provizaun sira tenke hadi’a, hodi nune’e bele fó impaktu pozitivu ba orsamentu no hamenus ain-fatin karbonu nasaun nian. Diversifikasaun fonte enerjia inklui enerjia renovável, tenke esplora liu tan.

Relatóriu ne’e mós inklui foka espesiál ida ba Kapitál Umanu (HC) – ne’ebé refere ba koñesimentu, kompeténsia, no saúde ne’ebé mak ema akumula durante sira nia moris, atu nune’e ema ida-idak bele hala’o ninia potensiál tomak. Sasukat husi Índise Kapitál Umanu (HCI), labarik ida ne’ebé moris iha Timor-Leste ohin loron sei sai 45% produtivu nu’udar ema adultu kompara ho nia-an se nia bele hetan edukasaun kompletu no saúde ne’ebé di’ak.

Risku husi Fundu Mina-Rai ne’ebé sei hotu iha dékada tuir mai – ekonomia ne’ebé depende ba minarai no permite hasa’e gastu ho forsa – katak povu Timor-Leste rasik presiza sai motor ba kresimentu ekonómiku nasaun nian. Ho pursentu 37 husi populasaun ho tinan 15 ba kraik, dezeña intervensaun ne’ebé efetivu hodi investe ba ema sira atu akumula no proteje kapitál umanu ne’e importante tebes.

Maski antes hasoru pandemia ne’e, iha dezafiu urjente sira; pur ezemplu 47% balu husi labarik ra’es badak sira, no estudante barak mak hetan rezultadu aprendizajen ne’ebé ladun di’ak tanba nível prestasaun servisu edukasaun ne’ebé ki’ik. Dezafiu hirak ne’e sai todan liu tan tanba pandemia COVID-19 ne’ebé perturba prestasaun servisu, porezemplu rezulta taka eskola no lakon aprendizajen ne ‘ebé afeta 45% husi labarik eskola.

Fokus diak ida ba investimentu kapitál umanu mak importante ba Timor-Leste nia kresimentu longu prazu. Investimentu kapitál umanu la’os deit kontribui ba kresimentu ekonómiku, maibé investimentu hirak ne’e mós kontribui efetivu atu hamenus ki’ak. Aumenta investimentu kapitál umanu tipikamente benefisia ema ki’ak sira liu husi hadi’ak defisiénsia no lakuna sira servisu nian, no hamenus dezigualdade sira.

Print Friendly, PDF & Email

LEAVE A REPLY

Please enter your comment!
Please enter your name here