Home Feature Abilidade Iha Área ICT, Nelson Ho Idade 25 Harii Rasik Kompañia 2...

Abilidade Iha Área ICT, Nelson Ho Idade 25 Harii Rasik Kompañia 2 Iha Liquiça

1613
0
Husi liman los mak Nelson dos Santos, hasai imajen hamutuk ho Prezidente APFTL, Zaulino. [Foto: Umbelina | 03.08.2022]

Reportajen Umbelina dos Reis

Idade joven hasoru problema no dezafiu oi-oin, maibé nia esforsu aan to’o susesu iha vida profisionál nu’udar tékniku Information Communication and Technology  (ICT). Hare husi ema seluk mak dehan nia susesu ona maibé nia rasik dehan sedauk susesu 100%. Antes husi prosesu eskola ne’e la’os hanoin atu eskola los de’it, maibé nia hala’o estudu iha sekundáriu  komesa tuir ona atividade ho formasaun oi-oin, ligadu liu ba área ICT nian.

Joven ne’e mak Nelson dos Santos, idade 25, husi munisípiu Liquiça, postu administrativu Bazartete, suku Metagou, aldeia Assorlema. Nia iha maun-alin hamutuk na’in 8, mane 5 feto 3. Nelson nu’udar oan mane daruak husi aman Graciano dos Santos no inan Fernanda dos Santos.

Nelson espresa, wainhira sei tuur iha banku sekundáriu, nia sempre fasilita nia maluk sira seluk iha área ne’ebé relevante liu ho IT nian. “karik ha’u tama eskola dader entaun, meiu dia eskola sai mak ha’u ba fasilita fali joven sira ne’ebé mak hakarak aprende kona ba área IT nian iha sentru formasaun, ho biban ida ne’e kontinua tuir prosesu iha eskola tekniku vokasinál nomos tuir estájiu profisional, ha’u maneja tempu hanesan ne’e to’o remata ensinu sekundáriu,” Nelson esplika ba Neon Metin.

Hafoin remata eskola sekundáriu, Tokodede oan ne’e falla nu’udar kandidatu iha universidade UNTL, maibé tamba ho paixaun ne’ebé aas iha área IT nian, nia desde kontinua nia estudu iha universidade UNITAL hodi hili área informátika nian. Nelson hato’o, iha semestre I no II nia hahú envolve aan iha organizasaun Fundasaun Dezemvolvimentu Software Livre (FDSL).

“Ita aprende ona ICT dala barak ita halo sosializasaun, formasaun kona ba IT ne’e rasik, maibé oinsá mak ita habelar informasaun sira ne’e ho di’ak no kredivel, entaun iha  esperiénsia rasik no sente forsa oi-tuan, entaun ami mos iha ideia ida katak oinsá mak ita harii Kompañia,” dehan Tokodede oan ne’e.

Agora da-dauk ha’u mos harii ona kompaña ida iha Liquiça ho naran Xtrabox Unipesoal.Lda. Harii iha loron  27 jullu tinan 2016, ho durasaun tinan lima (5) ona, ho moto ne’ebé nia foti mak  “Hanoin Lokál Bele Muda ba Global,” alein de ne’e nia mos iha kompañia seluk hanaran Liquiça host, ne’ebé foka liu ba host nian.

“ami hala’o atividade ne’e la’os dehan osan barak maibé iha hanoin ona katak ita timoroan mos bele, entaun liu husi kapasitasaun ICT, oinsá mak bele kompete iha mundu teknolojia. hanesan Joven ne’ebé mak  maduru tenkí maneja kalendáriu ne’e ho di’ak, ema ne’ebé mak hakarak sai susesu prinsipalmente tau prioridade ba nia ajenda, mezmu loron ida oras 24, maibé maneja tempu ne’e ho di’ak sei livre nafatin, ho nune’e ha’u maneja ha’u nia kalendáriu ne’e ho di’ak tebes, ha’u mos bele harii kompaña rasik,” hato’o Nelson ho korajen.

Nia esplika, esperiénsia ne’ebé mak nia hasoru, semestre II-III, nia kontinua tuir kompetisaun mezmu nia harii hela kompaña IT depois de ICT nian. Sira ba kompete entre universidade, dala barak ema dehan universidade, só UNTL de’it mak di’ak maibé universidae sira seluk dala ruma selu karun maibé kualidade laiha, entaun ho esforsu aan ida ne’e momentu ami tuir kompetisaun dezeñu website iha 2019, ha’u mak saí hanesan mana na’in primeiru lugar iha momentu ne’ebá, ikus mai  Sekretáriu Estadu Juventude no Desportu (SEJD) foti kedas ami nia sistema website uza iha SEJD.

“Ami mos hanoin katak oinsá mak harii organizasaun ida ne’ebé mak foka liu ba kapasitasaun ligadu ho internet saudável, entaun durante ne’e ami mos servisu hamutuk ho APFTL, kria sira nia sistema database,” tenik nia.

Nia dehan, alein de ne’e nia ho nia kolega kolega Elizito dos Santos, tur hamutuk iha konversa halimar hodi hamosu ideia ida, oinsá mak harii organizasaun hodi kria internet saudável, depois  hamutuk tan sira nia kolega na’in haat ne’ebé hakarak envolve mak, Maia Fatima, Ernestina Barros, Jose dos Santos, Bemis Funtala.

Hamutuk sira na’in neen no ba ideia ida ne’e, oinsá ami atu harii organizasun ho naran Fight for better future, hodi fo formasaun ba internet saudável, oinsá mak utiliza média sosial no internet ho di-di’ak, nia dehan ami kolabora hamutuk ho SEJD, ami fo formasaun ba 13 munisípiu.

Nelson akompanha hela nia staff halo serbisu IT. [Foto: Umbelina | 03.08.2022]

Da-daun ne’e Nelson haknaar aan iha Cruz Vermelha de Timor – Leste (CVTL) hanesan espesialista IT. Nia akresenta, iha loron Sábadu no Domingu nia tuir atividade no treinamentu iha Catalpa  internasional, oinsá atu dezenvolve aplikasaun ho Software ne’ebé mak iha mundu Globalizasaun, Nelson esplika ba Neon Metin iha Office CVTL, Bidau.

Nelson hato’o, nia sai facilitador ba IT Computer trainer of Microsoft office, iha Biamali Institute of  Science hosi tinan 2015-2016, Computer of Linux iha Fundasaun Dezemvvimentu Software Livre iha tinan 2016 to’o 2020, hanesan mos na’in ba kompaÑia Xtrabox Unip.Lda hosi 2016-2020, Likisahost Unip.Lda iha tinan 2018-2020, iha Catalpa internasional iha tinan 2020 to’o 2021, no iha CVTL hanesan IT Volunteer 2020-2021.

Nelson iha nia motivasaun susesu antes tinan 30, nia dehan, agora da-dauk ne’e nia tinan 25 ona sei tinan lima ba tinan 30, no ema seluk hatete katak nia susesu ona maibé ba nia dehan, “ha’u rasik sente sedauk susesu loloos, oinsá mak ha’u esforsu no buka esperiénsia hodi aprende nafatin iha área ICT. Nu’udar ema tékniku ko’alia barak, tenki mos iha implementasaun.”

Ba Nelson kategoria ona nu’udar joven tenki hamriik mesak, labele depende liu ba inan-aman. Nu’udar joven ne’ebé milenial tenki kreativu, hamriik metin hodi realiza objetivu ne’ebé mak di’ak, tau prioridade ba Kalendáriu no tempu. Tanba saída mak agora da-dauk Timor-Leste loke vaga tenki husu ema ho esperiénsia servisu mínimu tenki tinan rua? Ba Tokodede oan ne’e, dehan nu’udar vida estudante maibé tenki tau prioridade liu ba tempu para tuir formasaun sira hanesan komputador, língua, tuir semináriu ka workshop, hodi nune’e remata estudu ita mos iha ona esperiénsia lubuk ida para aplika iha ita nia área rasik.

Print Friendly, PDF & Email

LEAVE A REPLY

Please enter your comment!
Please enter your name here