Home EduTek Graduasaun UNTL Tarde, Rui: Hein Despaxu MESSK Abelita: Ami Lakon Oportunidade Kompete...

Graduasaun UNTL Tarde, Rui: Hein Despaxu MESSK Abelita: Ami Lakon Oportunidade Kompete Bolsa no Vakante

4242
0
Rui Loco Pires atual Diretor Nacional Atendemento Estudante iha UNTL. [Foto; Adroaldo | 05.08.2022]

Reportajen Adrolado “Saretukau”

Relasiona ho preokupasaun estudante finalista Universidade Nacional Timor Lorosa’e (UNTL), ba realizasaun serimónia graduasaun ne’ebé tarde, Diretor Nacional Atendimento Estudante (DNAE-UNTL), Rui Loco Pires informa, sei hein despaixu graduasaun hosi Ministériu Ensinu Superior Siénsia no Kultura (MESSK), iha fulan Agostu ne’e nia laran.

Diretor Rui hatete, estudante sira nia preokupasaun ba graduasaun tarde hodi difikulta sira ba aplika vakante no bolsa estudu, nia dehan sira hosi parte tékniku administrasaun mos preokupa, tanba bazeia ba kalendáriu akadémiku ne’ebé iha, tuir loloos graduasaun hahú iha fulan Juñu ou Jullu nia laran, tanba ne’e mak sira mos halo ona konfirmasaun ho parte MESSK.

“Maibé até agora despaixu Ministru nian seidauk bele hatuun, tanba ne’e mak parte administrasaun seidauk bele deside loron ne’ebé atu halo graduasaun. Se kuandu despaixu ne’e tuun mai ona, parte administrasaun bele deside, tanba se ami naran foti desizaun deside loron graduasaun ne’e, depois de muda entaun orsida ladun di’ak, tanba ne’e mak ami hein despaxu hosi Ensinu Superior hatuun ona mai universidade entaun foin deside loron ne’ebé atu halo graduasaun,” dehan Diretor DNAE, Rui ba Neon Metin, iha Kampus Sentral UNTL, Tersa-Feira, 02/08.

Diretor ne’e salienta, iha Segunda-Feira loron 1 Agostu, parte universidade UNTL halo ona konfirmasaun ba MESSK, maibé so halo konfirmasaun no ida ne’e kompeténsia tomak MESSK nian. Diretor ne’e dehan, “despaixu ne’ebé mak atu tuun mai ne’e iha fulan (Agostu) ida ne’e nia laran, maibé ha’u labele determina data,” labele to’o Setembru, atu nune’e hosi parte universidade bele halo preparasaun ba graduasaun semester par nian, nune’e sira bele prepara fali ba graduasaun semester impar ni-nian.

“Ami parte administrasaun ami ba kordena ho tékniku Ensinu Superior, despaixu ne’e iha ona, para ita bele deside loron ne’ebé atu graduasaun nian, ne’ebé iha fulan Agostu nia laran.” dehan Diretor Rui.

Iha parte sorin estudante finalista Fakuldade Agrikultura, Abelita Pinto preokupa ho graduasaun ne’ebé tarde tanba difikulta nia atu aplika ba bolsa de estudu no vakante balu tanba rekezitu balu presiza mak tenki iha diploma lisensiadu.

“Graduasaun tarde ne’e nia problema mak, nia impaktu ba ha’u pesoál mak, ha’u hanoin karik ha’u labele atu kompete iha oportunidade hanesan vakantes sira ne’ebé mak iha, atu asesu ba servisu tanba sein diploma, ha’u hanoin ita labele atu kompete, i ita mos la prienxe ema nia rekezitus ne’ebé mak iha.” dehan Abelita

Nia akresenta, impaktu seluk hosi graduasaun tarde mak nia labele aplika ba bolsa de estudu balu ne’e mak iha, ho data limitasaun balu mak taka ona. “Segundu ha’u labele asesu ha’u nia estudu iha nível maestradu, tanba iha kritéria bolsa sira ne’ebé mak iha, ita presiza iha diploma. Entaun hosi ita nia graduasaun tarde ida ne’e, mai ha’u preokupa tebe-tebes tanba ita nafatin hein i nafatin hein tanba sempre lakon ita nia oportunidade barak hanesan, iha bolsa ne’ebé ita sente hanesan natoon ba ita atuu bele kompete i iha mos kampu de traballu.” Abelita preokupa.

Nia hatutan, hosi graduasaun tarde ne’e susar mos atu aplika ba bolsa sira, tanba rekezitu ne’ebé mak iha tenki uza diploma lisensiadu, notas de transkrisaun finais ne’ebé aprova hosi MESSK, entaun hirak ne’e hotu sira seidauk hetan no sira presiza hein to’o hetan hodi aplika ba oportunidade ne’ebé iha.

Nia dehan, bazeia ba esperiénsia maske ita hetan ona títulu akadémiku maibé sein diploma, ida ne’e mos sai problema no ema ladun tau importánsia, tanba ne’e mak graduasaun tarde ida ne’e sai preokupasaun boot tebes. Estudante Fakuldade Agrikultura ne’e mos realsa tan katak, hosi vakante ne’e ne’ebé iha dala barak ema husu diploma. Alein de ne’e, situasaun ida ne’e perturba tebes sira nia tempu durante ne’e.

“Agora da-dauk ne’e iha programa ida ne’ebé mak hala’o hosi FDCH, maibé ida ne’e mos pur bazeadu ba ema ne’ebé graduadus, entaun ita hanoin ita nia valores, ita nia notas hirak ne’e bele prienxe maibé ita nafatin falta de dokumentu hanesan ita nia kaderneta ou sertifikadu de graduasaun.” dehan Abelita

Nia husu universidade no parte relevante hanesan MESSK atu hadi’a sistema ida ne’e, hodi aselera prosesu sira hotu tuir data ne’ebé determinadu ona. “Ida ne’e de’it mak ha’u presiza hato’o ha’u nia sujestaun ba iha universidade, atu bele karik aselera lalais graduasaun ida ne’e, atu nune’e ami bele simu graduasaun ida ne’e, hodi nune’e bele kompete ba oportunidade hirak ne’ebé mak ami hotu espera.”

Print Friendly, PDF & Email

LEAVE A REPLY

Please enter your comment!
Please enter your name here