Reportajen Adroaldo “Saretukau”
Cristovania no João sente kontente tuir atividade Desportu Dezenvolvimentu ba Labarik iha Timor-Leste, ne’ebé mak organiza hosi Sekretária Estadu Juventude no Desportu (SEJD) no Governu Korea liu hosi ajénsia KOICA, tanba bele tulun hasa’e sira nia abilidade iha futebol, di’ak ba sira nia saúde nomos sira koñese belun barak, tanba iha futuru sira hakarak sai jogador di’ak iha Timor-Leste.
Cristovania Fatima da Silva (11), hanesan jogador Sub 11, nia hatete foin tama jogu ne’e maibé nia “sente kontente tanba fatin ida ne’e rame depois tuir jogu futebol ne’e ita nia saúde di’ak, ne’ebé ha’u sente kontente tanba halo ita kosar hodi ita nia moras iha laran bele sai.” Nia hatutan, iha fatin ne’e rame nia bele hasoru kolega barak, no iha futuru nia dehan “ha’u hakarak sai jogador,”
Nune’e João Rui de Jesus Lopes jogador Sub 11 seluk espresa nia sentimentu “kontente tanba bele loke ita nia mehi no aprende di’ak liu tan konabá jogu sira no bele aprende konabá buat sira ne’ebé ita seidauk hetan nomos bele koñese di’ak liu tan kolega sira,” dehan nia hafoin serimónia graduasaun iha Kampo Demokrasia, Díli, Segunda, 21/11.
Nia hatete durante sira treinu nia aprende oinsá kontrola bols hodi pasa, loke kampu no attacking. Nia mos sente kontente tanba bele hasoru treinador hosi Korea. Nia mos hatete iha futuru “ha’u hakarak sai jogador.”
Iha parte sorin Project Leader ba Projetu ne’e, Chang Young Park informa aktividade prinsipál ne’ebé sira halo mak treinu no jogu, oinsá bele forma alin sira nia mentalidade pesoal ho mentalidade joga ida di’ak. “Iha ne’e iha aktividade sira mak aumentu nutrisaun (nutrition boost), aumentu abilidade moris (life skill boost). Nomos aktividade aumentu sira relasaun ho prosesu dezenvolvimentu labarik nian,” nia dehan tan, eventu ohin nian mak torneiu futebol no serimónia graduasaun ba futebolista juvenil sira.
Nune’e Sekretária Estadu SEJD, Abrão Saldanha “Nokosiku”, dehan aktividade ne’e la’o durante fulan neen nia laran no ohin iha serimónia graduasaun. Durante preparasaun sira halo ba labarik ne’e la’os de’it futebol, maibé sira hanorin oinsá sai joven ida di’ak, sai labarik ida di’ak. Ko’alia konabá edukasaun sívika, oinsá kontrola sira nia emosaun, oinsá respeita ema feto, hatene igualdade jéneru, oinsá komporta ho di’ak, ida pakote ida hosi treinamentu ne’ebé mak iha inklui mos treina futebol rasik.
“Ne’ebé aban bairua imi la sai selesaun nasional karik ka la sai karik jogador di’ak ruma mos, ita bele sai hanesan ema di’ak ida ba ita nia rain, ba ita nia família, ba ita nia komunidade no ba mundu,” dehan governante SEJD ne’e.
SEJD ho Governu Korea liu hosi KOICA, ita dezenvolve labarik sira liu hosi futebol juvenil, durante fulan neen nia laran. Ohin sira halo sira nia primeira tournament, ho jogador juvenil idade 8-11 no 12-16 iha sesaun dader ho loraik. Aktividade ne’e atu fo rekoñesimentu ba sira nia kompeténsia ne’ebé sira iha. Durante ne’e sira nia treinu hala’o iha Kampo Alor ho Komoro.
Patrosinador sira ba aktividade ne’e mak inklui Ministériu Edukasaun Juventude no Desportu (MEJD), FFTL, Kyung Hee University, KODAC, YMCA, World Vision Timor-Leste no Carol Tech Solution.
