Reportajen Joselina dos Santos
Sekretária Estadu ba Igualdade no Inkluzaun (SEII), servisu hamutuk ho Konsellu Imprensa (KI), no hetan apoiu husi United Nations Development Program (UNDP) iha Timor-Leste, sei fó formasaun ba jornalista sira iha media atu oinsá bele halo kobertura ba asuntu igualdade Inkluzaun nian liu-liu ba Violénsia hasoru feto no labarik feto, ema ho defisiénsia no komunidade LGBTQI.
Sekretária Estadu ba Igualdade no Inkluzaun (SEII), Maria do Rosário Fátima Correia hatete, enkontru ohin ne’e atu fahe rezultadu monitorizasaun Departamentu Monitorizasaun SEII nian kona-ba parte iha komunikasaun, atu haree oinsá rezultadu monitorizasaun ne’ebé haree liu ba jornalista sira hodi halo kobertura ba iha área Igualdade no Inkluzaun nian.
“Objetivu atu bele hametin liu tan liña komunikasaun entre SEII ho media sira, tanba ida ne’e programa anuál nian, entaun ami iha ajenda regular ida atu enkontru ho media sira hodi halo kobertura liu ba sensivel jéneru Inkluzaun iha rai laran”, Dehan Sekretária Estadu ba Igualdade no Inkluzaun (SEII), Maria do Rosário Fátima Correia, iha Caicoli, segunda 19/12.
Governante ne’e Dehan, iha enkontru ne’e fahe mos informasaun kona-ba matadalan ne’ebe SEII hamutuk ho KI hetan suporta husi UNDP liu husi programa spont lint nian ne’ebé konsege tinan ida ne’e halo ona Lansamentu ba matadalan oinsa atu halo kobertura ba asuntu igualdade Inkluzaun nian.
