Reportajen David da Costa Gusmao
Prezidente da Republika, Dr. Ramos Horta anunsia ba publiku, iha autoridade lokál, liderese arte marsiais sira nia oin kona ba eclipse solar total mak sei akontese iha fulan rua mai. Horta husu lider lokal sira hatutan informasaun ba komunidade ho prepara an. Prezidensia mos sei halo preparasaun ba situasaun ida ne’e liu hosi fahe informasaun, no mos koordenasaun ho parte governo nian.
“20 Abril sei iha eclipse solar total, rai sei nakukun kompletu. Akontese deit 300 anos dala ida. Iha mundo Timor ho Papua mak sei haree akontesementu ne’e. Akontesementu ne’e sei bolu atensaun turista sira nian. Ro turista 3 kontaktu ona atu mai, sientista hosi Spanyol, hau nia kolega mos sei mai, sientista lubuk ida tan. Sira sei mai atu haree reasaun ema, animal sira nian hasoru eclipse ne’e”, Presidente Horta esplika iha inisiu Dialogu Ba Paz nian, iha Palasiu Presidente, 07/02.
Iha fatin hanesan Presidente Horta mos husu atu ema hotu prepara. Labele hateke ba loron matan bainhira akontese eclipse tan bele halo matan at. Husu mos atu atensaun atu viajen karik kuidadu ho rai naruk no dalan bainhira eclipse mosu tan rai nakukun derepente bele hamosu dizastre.
Semana ida liuba Diretur Jeral Ministeriu Tutizmu, Jelino Quintas informa ona ba media kona ba preparasaun sira mak governo sei halo ba hasoru eclipse solar total ne’e. Eclipse ida ne’e sei haree diak liu hosi Lospalos no Viqueque, parte Beaco nian.
Eclipse solar total akontese bainhira bainhira diameter fulan nian bot liu loron matan tan loron dook liu hosi rai. Bainhira fulan taka netik loron matan nia naroman mak sei halo loron sai nakukun. Iha rai balun eclipse ida ne’e akontese fulan 18 dala ida, ba rai seluk bele tinan 300 resin mak akontese dala ida. Iha prediksaun eclipse mak akontese iha Timor-Leste sei akontese iha minutu 4 to’o minutu 7 resin.
