Home Notisia APHR: TL Konsistente Di’ak iha Demokrasia no Liberdade Internet, Dezafiu Internet Lentu...

APHR: TL Konsistente Di’ak iha Demokrasia no Liberdade Internet, Dezafiu Internet Lentu no Karun Liu Iha Mundu

549
0
Membru ASEAN Parliamentarian for Human Rights (APHR) halo konferénsia imprensa iha Hotel Novo Turizmu. [Foto: Adro | 03.2023]

Reportajen Adroaldo “Saretukau”

ASEAN Parliamentarian for Human Rights (APHR) ka Membru Parlamentares ASEAN ba Direitus Umanus hala’o misaun buka faktus ba internet livre iha Timor-Leste (facts finding missing on internet freedom), hodi avalia estadu nia liberdade iha internet hodi garante demokrasia ida inkluzivu.

Membru APHR hanesan mos membru Assembleia Lejislativa ida hosi Malázia, Gooi Hsiao Leung, liu hosi Konferénsia Imprensa iha Otel Novu Turizmu, Tersa-feira (03/10), hatete, “Timor-Leste konsistentemente di’ak kuandu ko’alia konabá demokrasia no direitus umanus, no ami inspiradu ho nasaun ne’e nia sosiedade ida vibrante, depois de nia luta naruk kontra kolonializmu no ditadura”,

“Embora eziste kestaun balu ne’ebé presiza aborda, espesialmente asesu no disponibilidade internet, ami fiar katak Timor-Leste bele rezolve ida ne’e ho ideia fundamental ba fundasaun nasaun nian,” nia tenik.

Timor-Leste nia entujizmu ba proteje direitus umanus no nia liberdade fundamental mak evidente hosi nia Konstituisaun 2002, hanesan úniku país hosi Sudeste Aziátiku klasifika hanesan “Livre” relata hosi Freedom House’s Global Freedom Index. Entre tantu, Timor-Leste enfrenta mos dezafiu ne’ebé presiza tau atensaun hodi mantein ninia estatutu nu’udar país demokrátiku no respeitu ba direitus sira iha rejiaun ne’e.

Sira ne’e mak infra-estrutura ne’ebé limitada hosi teknolojia informasaun no komunikasaun (TIK) iha país, ne’ebé rezulta konektividade ba internet ne’ebé lentu liu no karun liu iha mundu, dehan membru APHR seluk hosi Filipina, Raoul Manuel.

“Ami aplauda ba inisiativa governu Timor-Leste ne’ebé espanda velosidade nomos disponibilidade internet através kabu fibra óptika submariñu no terestre. Iha era dijital ne’e, asesu ba internet hanesan prioridade ida, nomos ida ne’e afeta signifikativamente ba direitu báziku, hanesan asesu ba informasaun no edukasaun.” Dehan membru APHR no membru Kámara Reprezentante hosi Filipina, Raoul Manuel.

Embora ne’e, liberdade imprensa iha Timor-Leste altamente avalia hosi organizasaun global Reporters Without Borders, jornalista no membru sosiedade sivil hato’o preokupasaun konabá amesa ba liberdade expresaun iha online. Maske nune’e to’o oras ne’e jornalista no sidadaun sira seidauk hetan pena prizaun, so iha prosesu balun, hanesan intimidasaun asédiu hosi parte autoridade ba aplikasaun lei.

“Ami husu ba governu no parlamentu Timor-Leste tenki garante kualker lejislasaun ne’ebé regula komportamentu online ne’ebé la viola liberdade expresaun no liberdade imprensa ne’ebé konsagra ona iha Timor-Leste nia Konstituisaun no iha direitu internasional ba Direitus Umanus.” Dehan membru APHR no eis membru parlamentu Tailándia, Kunthida Rungruengkiat.

Alein de lejislasaun, delegasaun APHR sira mos husu atu tau importánsia ba promove literasia dijital, tantu ne’e ba públiku ein jeral, ba instituisaun estadu, nomos ba entidade sira ne’ebé aplika lei sira.

Sira nia misaun ne’e hala’o entre 30 Setembru to’o 2 de Outubru, ho delegasaun APHR kompostu hosi membru Parlamentar aktual no sesante hosi Malázia, Tailándia no Filipina, iha ne’ebé sira hasoru malu ho Prezidente da Repúblika, Provedor Direitus Humanos e Justisa (PDHJ), Konsellu de Imprensa, Autoridade Nacional de Comunicações (ANC), Parlamento Nacional, nomos reprezentante Sosiedade Divil no organizasaun komunikasaun sosial sira.

Print Friendly, PDF & Email

LEAVE A REPLY

Please enter your comment!
Please enter your name here