Reportajen Joselina Dos Santos
Ema ho Defisiénsia (EhD) Timor-Leste, husu ba lider politiku sira liu-liu ba Prezidente Komisariu Politika Nasional Associação Populár Monarquia Timorense (APMT), bainhira ba halo konsolidasaun ruma ba nia militantes no simpatijantes sira iha baze, tenke uza liafuan ne’ebé ho dignu bainhira komunika ho ema defisiénsia, labele uza ema ho defisiénsia hanesan matéria kampaña, no ignora tanba sira mós iha direitu nu’udar sidadaun hodi ezerse sira objetivu iha vida polítika.
Liuhosi Konferénsia Imprensa, Porta Voz Carceres Nunes hateten iha momentu ne’ebe ema hotu preokupa ba asuntu defisiénsia, liu-liu asesu ba ema ho defisiénsia iha eleisaun Parlamentar, nune’e aproveita tempu ida ne’e hodi hato’o ba Lider Politiku sira ne’ebe ukun rai ne’e, nasaun ne’e eziste hanesan nasaun Republika Demokratika no replete ba prinsipiu diretus umanus ne’ebe enkuadramentu legal internasional sira ne’ebe fó protesaun ba ema ho defisiénsia.
“Relasiona ba preokupasaun hirak ne’e ami husu ba Adelino Monteiro hanesan Prezidente Komisariu Politika Nasional APMT, karik ita boot ba halo politika ka halo konsolidasaun ruma ba ita boot nia militante sira favor uza termus ida ne’ebe ho dignu labele uza ema ho defisiénsia hanesan materia kampaña maibe até ignora no la konsidera ema ho defisiénsia tan ne’e husu termus ida ho digno hodi komunika ho ita boot nia militante no simpatijante sira”, dehan Porta Voz Carceres Nunes Liuhosi Konferensia Imprensa, iha Salaun ADTL Kintal Boot, 28/02.
ADTL lamenta no kestiona tebes ba Adelino Monteiro favor uza terminolojia ida ne’ebe ho dignu loos atu nune’e komunika ho ema ho sensivel no labele ofende ema ida, klaru katak ema ho defisiénsia hamutuk 38 mil tuir Slsensus 2015 ne’e laos ema oituan entaun ida ne’e mós ema no sidadaun Timor-Leste entaun sira mós iha direitu atu ezerse nia direitu iha vida politiku tanba husu atu labele halo diskriminasaun ba ema ho defisiénsia.
