Reportajen Adroaldo “Saretukau”
Partidu Sosialista de Timor (PST), iha programa prioridade wainhira hetan fiar hosi povu iha eleisaun lejizlativa 2023, sei fo subsídiu ba agrikultór sira, hodi dezenvolve setór agrikultura, liu-liu poténsia produtu kada rejiaun hodi harii indústria.
Adjuntu Komisáriu Polítiku Partidu PST Munisípiu Ermera, Deometrio Amaral Ramos hatete, “tuir Partidu Sosialista de Timor haree katak, ita dependente totalmente hosi estranjeiru, tanba ne’e ita presiza subsídiu ba setór agrikultura, atu nune’e hasa’e ejisténsia produtu lokal, atu nune’e bele distribui ba merkadu nasional nomos en termus de merkadu rejional,” nia dehan ba Neon Metin iha ámbitu diálogu ho joven sira konabá diversikasaun ekonomia iha Salaun Delta-Nova, kuarta-feira, 27/04.
Hosi subsídiu ne’e Partidu PST haree atu bele iha divizaun ba indústria kada rejiaun ba poténsia produtu ne’ebé iha. “Ezemplu konkretu ida mak Ermera, Ainaro Liquiça no Same, ne’e poténsia ba produsaun kafé, entaun ita bele halo duni insdutrializasaun ba setor agrikultura kafé. Nomos hanesan Aileu, pertense ba Lequidoe ne’e tau prioridade mos ba iha setor industrializasaun produsaun sabraka no ai-nanas atu bele produs ba Dellos.”
Subsídiu ne’e PST proin ne’e mak ba ema sira ne’ebé hala’o aktividade agrikultura no iha to’os, governu bele fo subsídiu ba sira hodi dezenvolve sira nia aktividade.
“Tanba ne’e para hanorin ema agrikultor sira iha nasionalizmu ba iha setor agrikultura. Ida ne’e mak parte ida ne’ebé partidu Sosialista de Timor haree, ita presiza fo subsídiu ba setor agrikultura, atu nune’e ema bele hasa’e sira nia produtividade setor agrikultura iha nia to’os rasik.”
Parte seluk Partidu PST nia haree tenki iha balansu hodi fo mos subsídiu ba setor edukasaun hodi forma rekursu uma ne’ebé bele kontribui ba dezenvolvimentu.
“Sé bainhira ita ko’alia konabá ema mak sai ajente importante ba ajente estadu ida nomós edukasaun nu’udar fator importante ida atu lori dezenvolvimentu, wainhira ita ko’alia konabá diversikasaun setor ekonomia, entaun ema ne’e importante, depois ita atu bele dezenvolve setor ekonómiku, presiza rekursu umanu, tanba ne’e ita presiza rekursu umanu ne’ebé kualifikadu, integradu atu nune’e bele aplika ba kampu de traballu.”
Partidu PST mos garante katak, liu hosi subsídiu iha setor edukasaun bele hasa’e kualidade ema nian hodi bele prepara ba dezenvolve setor agrikultura.
