Reportajen Silvino Freitas
Forum Sosial Maubere realiza konferénsia kona-ba sosiedade no planeta sustentável, hodi hakbiit sosiedade no feto rural atu reziliente hasoru krize ekolojia no injustisa ne’ebé mundu enfrenta.
Koordenadór Forum Sosiál Maubere, Avelino Ribeiro hateten husi konferénsia atu reúne kámara no klase sosiál hotu traballadór toos-nain juventude, intelektuál universitáriu sira no kiak rurál sira atu mai tau hanoin hamutuk ba krize ekolojia no injustisa sosiál, ne’ebé ohin loron iha Timor Leste buras tebes.
“Husi ne’e mak ita bele junta forsa hamutuk bele tulun estadu hodi fila ba nia karakter loloos libertadór nian, la’ós sai de’it árbitru hodi fó tomak dezenvolvimentu ba kapitál estranjeiru, maibé presiza tau hanoin hamutuk ba dezenvolvimentu ida di’ak no sustentável, ba interese ema hotu nian” dehan Avelino iha Largo Lesidere, (29/04).
Nia dehan tan, krize ekolojia ne’ebé lao ohin loron husi mudansa klimátika ne’ebé provoka hodi lori afetasaun ba komunidade ba klase maubere sira, tanba ne’e planeta no sosiedade sustentável ida ne’e tanke integra ho kestaun ekolojia, tanba ita iha rekursu ne’ebé limitadu nune’e rekursu natural sira ne’ebé iha ne’e jere ho kuidadu atu ba duni povu barak nia moris di’ak no la hariku de’it grupu no elite balun.
“Luta feto barak ne’ebé ita presiza kestiona ohin loron ema promove feto maibé ho dalan ida ba feto individuál maibé laiha klase feto rurál sira polítika ne’ebé koletivu no radikál duni para atu liberta feto, krizi ekolojia ohin loron feto sira mak barak liu halo kontaktu ho bee ai-sunu no toos, entaun ita presiza hanoin” nia esplika.
Nia konklui, tanba krize ekolojia buras nia afeta barak liu mak ba feto, entaun ho objetivu atu halibur feto sira hodi diskute konseitu estratéjia loloos ba feto hotu, la’ós ba de’it feto sira ne’ebé asesu ba eskola di’ak, tanba ne’e presiza haree mós feto rural, traballadora no feto vendedór iha setór informál sira, konferénsia ne’e partisipa husi sosiedade-sivíl, movimentu sosiál no universitáriu sira.
