Reportajen Adroaldo “Saretukau”
Organizasaun Rezisténsia Nasional dos Estudantes Timor-Leste (RENETIL) husu ba autoridade seguransa no orden públiku nian atu kontinua hala’o sira nia servisu ho profisionalidade no tane aas prinsípiu imparsialidade.
“RENETIL apresia Governu nia desizaun hodi mobiliza unidade balun husi FALINTIL – Forsa Defeza Timor-Leste (F-FDTL) hodi apoia Polísia Nasional Timor-Leste (PNTL) atu garante seguransa, liu-liu iha área sira ne’ebe identifika ho poténsia konflitu violentus. Maibe RENETIL kontinua fo hanoin atu mantein regras no prosedimentu ne’ebé klaru atu garante katak engajamentu Forsa Defeza nian iha apoiu ba manutensaun orden públiku ne’e la’o tuir lei,” sita karta komunikadu Renetil ne’ebé Neon Metin asesu, tersa-feira, 02/05.
Renetil sauda povu no partidu polítiku sira ba komportamentu síviku ne’ebé permite semana rua dahuluk kampaña eleitoral la’o iha ambiente ida relativamente pasífiku. Maske nune’e, RENETIL lamenta katak sei iha insidente violénsia no provokasaun ba violénsia ne’ebe rejista iha fatin balu. Iha Renetil nia observasaun, konfrontu sira ne’e balun loloos bele evita karik iha aksaun lalais husi autoridade seguransa nian atu foti medidas hodi prevene provokasaun entre apoiante partidu sira hamosu konfrontus violentus.
“RENETIL fiar katak ho esforsu husi elementu hotu-hotu hosi sosiedade Timor-Leste nian, eleisaun parlamentar 2023 sei la’o iha ambiente ne’ebé pasífiku, no sai eleisaun ida ne’ebé livre no justu.” Sita Karta Komunikadu RENETIL.
Renetil sei hala’o observasaun ba Eleisaun Parlamentar 2023, hahú husi períodu kampaña eleitoral to votasaun no kontajen votus, ho observador nain 200 resin, ne’ebé naklekar iha territóriu tomak, ho esepsaun Munisípiu Aileu no RAEOA.
