Reportajen David da Costa
Iha ámbitu kampaña Elitorál ba Eleisaun Parlamentar 2023, Resistência Nasional dos Estudantes de Timor-Leste (RENETIL) husu ba membru RENETIL sira ne’ebe namkari iha partidu oi-oin, atu mantein disciplina, evita halo deklarasaun ho kontein insultu no atake hasoru individu nomós líder sira husi partidu selu iha kampaña elitorál.
Iha Komunikadu Imprensa, Sekretáriu Jeral, Resistência Nasional dos Estudantes de Timor-Leste (RENETIL), Joaquim da Fonseca “Russo” Hateten, RENETIL lamenta katak partidu politiku balun sei uza komisiu eleitoral sira hodi halo atake pessoal ba individu ka líder husi partidu politiku seluk, no la konsentra deit iha esklaresiementu ba ida-idak nia programa politika.
“Tanba ne’e, husu ba membru RENETIL sira ne’ebe namkari iha partidu oi-oin atu mantein disciplina no haburas tolerância no respeitu mutuo iha ida-idak nia partidu laran, no evita deklarasaun sira ne’ebe kontein insultu no atake pessoal hasoru individu ka líder sira husi partidu seluk,” dehan iha Komunikadu Imprensa, ne’ebé Neon Metin Asesu ohin husi RENETIL, Tersa 2/05.
No ba partidu politiku sira atu uza kampaña eleitorál hanesan oportunidade ba hala’o edukasaun sivika, no hanesan oportunidade ida ba konsolidadaun paz, demokrasia no haburas toleransia iha Timor-Leste. Ho ida ne’e, RENETIL husu mos ba partidu politiku sira atu evita atake pessoal hasoru individu ka líder husi partidu seluk.
Entertantu RENETIL sei hala’o observasaun ba Eleisaun Parlamentar 2023, hahú husi períodu kampaña eleitorál to votasaun no kontajen votus, ho observador na’in-200 resin, ne’ebé naklekar iha territóriu Timor tomak, ho eksepsaun Munisipiu Aileu no RAEOA.
