Filomena da Conceição
Estudante akademiku sira iha esperansa ba partidu polítiku ne’ebé manan iha eleisaun Parlamentár hodi lidera nonu governu, atu hasa’e orsamentu 20% ba iha setór edukasaun atu bele hadia fasilidade edukasaun iha eskola hotu, hodi garante edukasaun ne’ebé efisiente no efikaz hodi bele atende dezenvolvimentu iha rai laran.
Tuir estudante Ika Junior, hateten, durante governsaun la’o hela mai to’o iha oitavu governu seidauk garante edukasaun ida ne’ebé di’ak ba estudante sira, hahu husi ensinu primaria mai to’o iha ensinu superior no seidauk fó satisfasaun ba estudante sira, portantu Orsamentu Jerál do Estadu ne’ebé aprova maibé la fó efisiensia ne’ebé diak liu ba sistema administrasaun estudante sira, tanba iha programa polítiku nain sira ko’alia barak maibé pratika ne’ebé akontese iha sosiedade nia le’et seidauk barak no fasilidade ba estudante sira la kompletu.
“Hanesan estudante Akademiku kritika no husu ba partidu polítiku sira ne’ebé lidera nonu governu, tenke kria edukasaun ne’ebé di’ak hodi garante kualidade di’ak ba estudante sira husi área rurais, Munisípiu no mai to’o nasionál, no prioridade liu ba UNTL, liu-liu hasa’e orsamentu ba Setór edukasaun maizumenus 20%, atu nune’e bele garante infrastrutura baziku husi eskola sira no loke kompetisaun ba edukasaun sira liuliu iha edukasaun formal,” dehan Yka ba Jornalista Neometin iha kampus FCS Kaikoli, Sabadu 29/04.
Nia akresenta, povu liu-liu joven sira tenke matenek hodi tetu programa husi líder polítiku sira ne’ebé hato’o iha palku polítiku no labele haree kor ka rasa husi lider sira atu nune’e bele fó votus hodi garante moris diak liu-liu ba setór edukasaun iha Timor-Leste.
Iha fatin hanesan estudante Tiago Madeira, haktuir, tinan ida ne’e tinan polítika ba elisaun parlamentár, ne’ebé sei akontese iha dia 21 de Maio 2023 nune’e, husu ba polítiku nain sira iha ne’ebé manan iha eleisaun hodi lidera nonu Governu mai atu prioridade ba setór edukasaun, tanba setór edukasaun hanesan pontu importante ida hodi muda ema nia hanoin, ema nia Moris no ema nia mentalidade.
“Hanesan estudante husu ba lider partidu polítiku sira ne’ebé maka hato’o programa oioin iha palku polítiku nian, bele halo polítika ida ne’ebé diak atu bele garante bem- estar ba ema hotu-hotu, liuliu ba setór edukasaun tanba iha artigu 59 hateten katak edukasaun mak sai xave ba dezenvolvimentu Nasionál. Entertantu kuaze tinan (20) resik ona no Governasaun dala walu ona maibé setór edukasaun sei minimu hela. Tanba ne’e ha’u nia esperansa ba polítiku nain sira ne’ebé lidera nonu governu mai bele hadia sistema edukasaun atu bele garantia kualidade edukasaun, ida ne’ebé garantia prestasaun edukasaun ne’ebé di’ak ba estudantes sira liuliu iha área rurais” dehan Tiago.
Nune’e mós, estudante Davia Freitas Belo, hateten, edukasaun maka sai xave ba ema hotu-hotu atu bele garante dezenvolvimentu iha rai laran tanba ne’e husu ba lider husi partidu polítiku sira ne’ebé liu bareira hodi kaer ukun bele dezenvolve liu tan setór edukasaun iha Timor-Leste.
“Hanesan estudante ha’u hakarak husu ba partidu polítiku sira ne’ebé maka lidera nonu Governu mai, bele hadia setór edukasaun ida diak ba ami estudante sira liuhusi fasilidade edukasaun nian liuliu kria biblioteka ba estudante sira, meza, kadeira, no livru ba estudantes sira para bele ajuda estudante sira atu grante kualidae edukasaun nian,” Davia nia esperansa.
Entertantu estudante Lidia Filipe Gama, hateten Programa politiku ne’ebé daudaun ne’e la’o hela, iha polítika nain sira barak maka Promete sei hadia setór Edukasaun, tanba ne’e polítika nain sira ne’ebé liu bareira hodi kaer ukun keta haluha implementa no halo tuir promesa ne’ebé sira halo atu nune’e bele garante sistema edukasaun iha Timor-Leste.
“Nu’udar estudante nu’udar mós joven ida, hakarak husu ba líder polítiku sira atu tau atensaun maximu ba programa sira ne’ebé fó sai iha kampana hodi bele realiza bainhira hetan fiar husi povu, liu-liu ba setór edukasaun iha Timor-Leste tanba atu forma jerasaun foun ne’ebé intelektual ka kualifikadu iha futuru presiza kualidade edukasaun hodi bele garante ba estudante hotu hodi promove sira-nia prosesu estudu” dehan Lidia.
