Reportajen SIlvino Freitas
Observador Internasionál husi nasaun G7+ Sierra-Leoa no Guinea-Bisau sei obeserva direita eleisaun parlamentar, hodi bele haree prosedimentu legal sira tuir regra governu nian, nune’e mós sei hala’o relatóriu jerál hodi submete ba Comisão Nacional Eleisão (CNE) no Secretariado Tecnico Administração Eleitoral (STAE).
Nasaun membru G7+ husi internasional no nasionál halo observasaun ne’e ho objetivu maka atu observa eleisaun parlamentar ne’ebé sei realiza iha 21 maiu no tuir mai maka kooperasaun entre nasaun frajile sira hodi fó oportunidade ba membru nasaun G7+ atu fahe esperénsia no aprende ba malu, nunee iha prosesu eleisaun ne’e bele hato’o mós rekomendasaun balun ba oragaun relevante hanesan CNE no governo Timor Leste.
“Hau mai iha Timor Leste dalarua ona iha tinan kotuk ha’u mai iha eleisaun prezidensiál nian, durante loron hira ne’e ami akompaña polítika sira nia kampaña inklui debate sira, durante eleisaun ami sei fahe ba ekipa hodi halo observasaun ba iha Dili no munisípiu balun, remata eleisaun ami sei hala’o relatóriu jerál hodi submete ba instituisaun relevante sira” dehan Larry Fangawa observador husi nasaun Sierra Leoa lihusi konferénsia imprensa iha sede G7+ Dili, (19/05).
Entretantu observadór husi Guine-Bisau Fernando Monteiro hateten, sira nia presente nu’udar misaun husi G7+ nian no foin ba dalauluk Guinea-Bisau hamutuk ho grupu G7+ sai hanesan observadór, hodi hamutuk asiste eleisaun parlamentar no sira mós hasoru malu ona ho CNE no akompaña mós kampaña husi partido polítika sira, observasaun ne’e sei hamutuk ho observadór nasionál nune’e iha eleisaun ne’e remata sei hato’o rekomendasaun balun ba iha governu Timor Leste, atu bele iha funsionamentu ne’ebé di’ak ba eleisaun parlamentár.
“Prosesu observasaun ne’e sei hala’o iha munisípiu Dili, Likisá no Manatuto” dehan Observador Guinea-Bisau Fernando Monteiro liu husi konferénsia imprensa.
Observadór Sierra Leoa Ibrahim Kamara konklui katak, durante ne’e sira sei hala’o observa ba materiál sensetivu no la sensetivu nomós ba servisu ofisiál tékniku sira ho nia prosedimentu hotu nune’e hasoru ona STAE no CNE nune’e depois remata eleisaun ne’e sei submete mós relatóriu ba sira, tanba ekipa sei akompaña prosesu tomak hahú husi abertura votasaun no enserasmentu, hodi bele hatene katak regra sira ne’e bele tuir prosedimentu ne’ebé governu hasai tiha ona.
