Reportajen Adroaldo “Saretukau”
Relasiona ho konsumidor nia preokupasaun ba stock mina ka gazolina iha Postu Abastesimentu Kombustível (Pom Bensin) iha Díli laran balu taka tanba mina laiha, Autoridade Nacional do Petróleo e Minerais (ANPM) liu hosi Departamentu Downstream klarifika katak gazolina la’os laiha maibé menus de’it no sei normaliza hikas iha semana oin hahú segunda 12 Juñu, tanba fornesidor ETO nia stock mina gazolina sei tama iha Domingo purvolta 2700 toneladas no Pertamina Internasional nian sei tama iha Kuarta.
Diretor Downstream, Nelson de Jesus informa relasiona ho situasaun kombustível iha ita nia rai laran katak sira rekoñese iha duni problema menus gazolina komesa iha segunda (05/06) to’o agora tanba menus armazenamentu iha infrastrutura fatin rua, Pertamina Internasional Pantai Kelapa no Esperansa Timor Oan (ETO), Hera.
“Ami hakarak hatete ba públiku katak ita menus de’it mak gazolina la’os dehan laiha, menus. Ami servisu hamutuk hela ho fornesidor fatin rua, Pertamina Internasional nomos ETO, bele jere gazolina to’o iha Domingo (11/06) tanba iba Domingo ita nia ro, ETO nia kargo tama ona iha nia kais iha Hera iha Domingo tuir oráriu iha loraik ou kalan, entaun ba segunda ita bele komesa normal fali, ne’ebá ba gazolina de’it,” dehan Diretor Downstream, Nelson iha konferénsia imprensa ne’ebé hala’o iha Ministériu Finansas, Ai-tarak laran, kuarta-feira, (07/06).
Diretor ne’e informa to’o ohin (07/06) ita iha de’it 330 toneladas iha fatin rua, Pertamina Internasional ho ETO. Pertamina Internasional hela de’it 125 toneladas no ETO iha de’it 205 toneladas ba gazolina, ne’ebé sei bele aguenta ba semana ida ne’e ho kualidade ne’ebé ki’ik.
“Saída mak sira bele halo, Pertamina Internasional so bele hasai de’it 25 toneladas por dia komesa ohin (07/06) to’o Domingo (11/06), entaun fatin Postu Abastesimentu Kombustível balun sei la hetan, sira prioridade liu ba Postu Abastesimentu balu iha Díli nomos ETO mos hanesan nia sei haree balun iha Díli nomos balu iha munisípiu sei la atende, sira ne’ebé iha hela sira sei la atende para distribuidaun ne’e to’o ba ema hotu.”
Diretor ne’e informa, Domingo (011/05) kargo ETO sei iha Díli ho montante gazolina purvolta 2700 toneladas. No Kuarta Pertamina Internasional nia kargo sei to’o iha Díli.
Tanbasá situasaun ida ne’e akontese? Diretor Nelson hato’o, tanba fornesidor Pertamina Internasional ho ETO sira nia ro labele tama iha terminal tuir oráriu ne’ebé iha hodi tula mina iha fatin ne’ebé sira hola mina ba, tanba hosi nasaun seluk mos tama ba terminal ne’ebá hodi tula mina, nune’e mak sei sei antrian ka hein, ho ida ne’e mak halo atrazu oi-tuan tanba lo-loos mina tama ona horiseik (06/05).
Ohin (07/05) Postu Abastesimentu Kombustível iha Díli hamutuk 21, rua mak taka ka la fa’an, 12 mak la fa’an gazolina no 9 seluk fa’an hela. Hosi Postu Abastesimentu Kombustível 12 ne’ebé la fa’an gazolina, aban (08/06) sira bele hetan oportunidade hosi Pertamina Internasional nomos ETO, tanba fornesidor na’in rua ne’e sei fo oportunidade de’it ba Postu Abastesimentu Kombustível balu nomos haree ba nia lokalizasaun hanesan iha parte oeste, sentral no leste nune’e bele iha balansu.
“Ita la iha problema ho gazoel, gazoel barak hela, tanba gazoel nia tanki mak boot.”
