Reportajen Umbelina dos Reis
Haburas Foundation hamutuk ho estudante husi Melbourne University vizita vizita fatin turizmu Pouzada Maubisse, fatin istória kultura uma lisan no ambiente iha Maubisse. Tuir sira nia hare no sente rai Maubisse ne’e fatin uniku no riku ho istoria kultura nian, nune’e husu ba joven Maubisse tenke kuida di’ak hodi promove iha futuru reprezenta nasaun nian.
Estudante Zac sente kontente no onra boot bele mai vizita Timor-Leste, no hare komunidade Maubisse haka’as aan, hodi integra turizmu iha Maubisse iha sira nia vida moris loro-loron.
” Ha’u kontente tebes hala’o vizita mai Maubisse tanba komunidade sira simu ami ho laran luak no prontu fahe esperensia matenek mai ami, maibé iha nasaun Australia industria turismu mak dezenvolvidu liu ona, maibé iha Timor-Leste komunidade rasik halo turismu komunitáriu nian, entaun di’ak liu fali turismu iha Australia.” dehan estudante Zac, ba Neon Metin, iha fatin turismu HAKMATEK, Maubisse, Domingo, 16/07
Nia dehan fatin turismu entre Timor-Leste no Australia ne’e diferente tebes, tanba iha Timor fatin turizmu ba vizitante sira mai hamutuk ho komunidade, no hare direita sira nia moris loro-loron, maibé turizmu iha Australia fatin hotu-hotu hanesan de’it, inklui ai-han iha hotél laran moos hanesan nune’e diferente tebes, iha Timor mak uniku liu tanba iha mos turizmu komunitáriu
Nia lia menon ba joven Maubisse oan sira katak, tenke kuida di’ak ambiente, kultura, istoria no rikusoin Maubisse nian tomak, ne’ebé bei-ala sira husik hela mai jerasaun foun, nune’e promove nafatin ba futuru, hodi atrai vizitante sira hosi nasaun seluk, nune’e nasaun seluk bele aprende no hatene istória hosi Timor.
Iha fatin hanesan estudante Rose hateten, durante viajen iha Timor to’o mai komunidade Maubisse nia moris loro-loron, sente diferente tebes entre komunidade iha kapital Dili, tanba iha Dili komunidade barak moris iha tasi-ibun ,maibé iha Maubisse lae balun moris rasik iha sira nia kintál ?
“Sente kontente no orgullu tebes vizita fatin Maubisse tanba beleza furak, maibé dalaruma moos fo impaktu ba komunidade nia moris karik? tanba moris iha sidade no foho ne’e sente diferente oituan. Maibé agradese tebes tanba komunidade iha Maubisse simu ami hanesan familia no toba iha sira nia uma lisan lulik, no aprende esperiénsia kona-ba kultura istoria Maubisse nian.” dehan estudante India-Rose, ba Neon Metin, iha fatin turismu HAKMATEK Maubisse, domingu, 16/07
Nia dehan, durante viajen iha Timor, buat hotu foun no sente uniku tebes, tanba foin primeira vez hare no rona istoria kultura Timor nian, agradese tebes tanba sira estuda materia Jeografia nune’e ohin loron ami vizita duni rai Timor ne’e hanesan onra boot.
