Reportajen Umbelina dos Reis
Haburas Foundation fasilita estudante university Melbourne Australia hosi departamentu Jeografia hala’o vizita iha Maubisse, durante loron ha’at (4), sira hakarak buka hatene kona-ba matéria ne’ebé sira apriende durante iha eskola, nune’e sira buka rasik realidade hosi siénsia. Estudante sei observa direita ba ambiente no plantasaun café, kultuta no bee matan iha Maubisse.
Diretor Haburas Foundation, Hortencio Pedro Vieira hateten objetivu hosi atividade refere ne’e planu hosi estudante university Melbourne Australia nian hodi viazen ba nasaun balun inklui Timor-Leste. Entaun estudante sira estuda materia kona-ba Jeografia, kultura, no sosío antropologia, entaun sira hakarak mai vizita oinsá situasaun ne’ebé realidade iha Timor.
“Estudante University Melbourne Australia mai observa direitamente komunidade Maubisse Mauloko, nia moris loro-loron konaba planatasaun kafe no kultura bee matan, nune’e hodi kompleta sira nia estudu iha área jeografia nian. Aleinde ne’e sira moos vizita illa Atauru kona ba lensket no peskas nian.” dehan Diretór Haburas Foundation, Hortencio Pedro Vieira, ba Neon Metin, iha suku Maubisse, aldeia Teli-tuku, sabado, 15/07
Estudante university Melbourne hosi Australia hala’o viajen durante semana rua resin iha Timor, sira mai ho rekursu rasik no selu rasik nesesidade báziku nian. Iha Dili estudante sira moos partisipa konferensia Internasional TLSA ne’ebé realiza hosi estudante universidade nasional Timor-Lorosa’e (UNTL), no vizita moos fatin Centru Nasional Chega (CNC), ne’ebé nakonu ho istoriku Timor nian, vizita moos illa Atauru fatin turizmu, inklui Maubisse.
Iha fatin hanesan Doutor Alexandre Callend, hateten objetivu lori estudante university Melbourne hosi Australia mai Timor-Leste hodi vizita fatin turizmu no oinsá hatene kultura Timor nia lala’ok ne’e oinsá tanba vizita ne’e importante no nasaun rua ne’e viziñu.
“Mai vizita komunidade Maubisse nia moris loro-loron ne’e oinsá, nune’e bele kompara fatin ne’ebé mak diferensa iha Timor. Durante loron ha’at iha Maubisse estudante hetan oportunidade di’ak hodi observa direita no rona istoria kultura, uma lisan no bee matan, Maubisse nian, no hare direita uza metodu saida mak kuda no ku’u plantasaun cafee iha to’os, no komunidade faan plantasaun sira ne’e ba se ? Inklui vizita no observa ambiente ne’ebé furak iha Maubisse Mauloko. Bainhira estudante mai vizita fatin turizmu iha Timor , sira sei promove kultura no istoria Timor-Leste nian, nune’e atrai nasaun seluk bele mai vizita barak liu tan.” nia dehan
Realiza atividade refere komunidade hosi Maubisse Mauloko, kontente tebes simu ho kultura “serigala lulik” ba ekipa Haburas Foundation no estudante university Melbourne Australia ho nia dosente sira, ne’ebé viajen hosi Dili ba Maubisse.
