Reportajen Silvino Freitas
Rádiu Komunidade Difisénsia Timor Leste hasoru malu ho Sekretáriu Estadu Komunikasaun Sosial (SECOMS) hodi aprezenta sira nia programa inklui difikuldade ne’ebé sira infrenta atu bele hetan apoiu husi govenru, nune’e SECOMS sei tau atensaun espesiál tanba sira iha programa ne’ebé kapaas ba ema ho difisénsia nia lian.
Tuir Diretora Rádiu Komunidade Difisénsia Timor Leste Ermenciana Alves katak, sira hasoru direta SECOMS atu bele haree rasik ba sira nia difikuldade ne’ebé infrenta, no mós progressu ne’ebé sira hetan, nune’e sira hasoru SECOMS hodi ko’alia kona-ba programa 4 ne’ebé la’o iha munisípiu sira, programa kona-ba kobertura tanba rádiu difisénsia foin mak eziste tanba ne’e presiza hala’o kobertura iha munisípiu hotu atu bele foti lian difisénsia sira nian, tuir tan maka presiza iha formasaun atu bele iha konesimentu hodi lori rádiu difisénsia ba oin nafatin parte ikus liu maka nesesidade ema idak-idak ne’ebé servisu ba rádiu difisénsia nian atu bele apoiu intensivu ba rádiu difisénsia.
“Husi sorumutu ne’e SECOMS fó resposta katak sei tau atensaun espesiál ba rádiu komunidade difisénsia nian, tanba ne’e ami éspera katak iha tempu tuir mai ami sei la la’o mesak maibé sei la’o ho SECOMS atu bele haree ami nia programa sira no mós bele rezolve difikuldade ne’ebé ami infrenta” dehan Ermenciana hafoin hasoru SECOMS iha palásiu governu Dili, (02/08).
Entretantu SECOMS Expedito Dias Ximenes hateten, rádiu difisénsia Timor Leste iha governu anteriór hetan apoiu ona, maibé sira nafatin hasoru difikuldade maibé sira mós haree katak iha nonu governo bele apoiu sira nia rádiu, nune’e mós nonu governo iha nia programa atu fó atensaun makaas ba rádiu komunitáriu sira hotu no espesiálmente sei fó atensaun mós ba rádiu komunidade difisénsia Timor Leste.
“Pontu 4 ne’ebé ohin diretora rádiudifisénsia hato’o ami haree katak importante mak oinsá sira bele alarga sira nia area kobertura, formasaun oinsá forma aprezentadora ba notísia no mós formasaun ba editor ba video ide ne’e governu sei fó atensaun, tanba sira nia kapasidade hatudu katak maskí sira iha difisénsia maibé sira iha kapasidade ba lian laek sira, ne’e hanoin katak governu no organizasaun sosiál sira presiza tau atensaun” dehan Expedito hafoin sorumutu ho rádiu difisénsia sira iha palásiu governu, (02/08).
Expedito dehan, nia mós promete ona bá rádiu difisénsia sei hala’o vizita primeiru hodi haree besik ba sira nia programa no difikuldade ne’ebé sira atrvesa, sira mós iha programa ne’ebé kapaas maka oinsá haklean konesimentu ema ho difisénsia, sira nian nomós programa difisénsia potensiál maka ema ho difisénsia ne’ebé iha potensiál atu dezenvolve ema difisénsia ne’ebé iha kapasidade di’ak.
