Reportajen David da Costa
Organizasaun Arte Marsial (OAM), Ikatan Keluarga Silat (IKS) Timor-Leste (IKS-TL), Kera Sakti, la hanorin nia membru sira hodi halo problema, maibé hanorin membru sira maka silat no oinsa maka atu proteje aan nomos bele tulun ema seluk bainhira husu ajuda.
Membru Organizasaun Arte Marsial Ikatan Keluarga Silat (IKS) Timor-Leste (IKS-TL), Kera Sakti, Geovania Miranda Lopes Pinto (16), hateten, dadaun ne’e involve hela iha organizasaun Kera Sakti, hahú iha 2020 ne’e tama ona iha organizasaun hodi Aprende kona-ba kungfu, silat no bele depende aan bainhira ema seluk asaltu bele defende aan nomós ema seluk husu ajuda bele tulun sira.
“Ha’u gosta involve iha organizasaun, tanba ha’u la’o iha loron ka kalan ema ruma asaltu ha’u karik ha’u bele defende ha’u nia-aan no mós ema seluk bainhira husu tulun bele ajuda. Ha’u orgullu involve iha IKS, tanba feto mós iha direitu involve iha organizasaun sira,” Dehan Membru IKS-TL, Kera Sakti, Geovania ba Neon Metin, iha Eis Merkadu Comoro, Sesta 8/09.
Dala-barak ema sempre fó sala ba arte marsiais sira maka halo problema, la aseita ho ida ne’e, tanba organizsaun ida la hanorin nia membru sira bainhira treinu ona karik ba halo problema, ida ne’e oraganizsaun la hanorin ba nia membru sira, maibé organizasaun hanorin ba membru sira maka oinsa atu bele proteje aan.
“Ha’u la aseita arte marsial maka involve iha problema, tanba Organizasaun nunka mais hanorin ami hodi ba baku malu, maibé involve iha organizasaun ne’e atu salva ami nia-aan no mós ema seluk karik husu tulun ami bele ajuda,” nia esplika.
Nune’e mós nia hato’o mensajen ba publiku sira, feto mós iha direitu hodi involve iha organizsaun hotu, tanba tama iha organizasaun la’os atu ba baku malu, la’os uza forsa hodi ba hadau ema nia sasan, maibé tama iha organizasaun ne’e atu proteje-an no karik ema seluk husu ajuda bele salba mós sira.
Enkuantu Veronica Sarmento (19), hatuir mós, nia tama iha Organizasaun arte marsial Ikatan Keluarga Silat (IKS) Timor-Leste (IKS-TL), Kera sakti, ne’e iha tinan 2022, no tama iha organizasaun ne’e aprende kona-ba kungfu, silat, oinsa maka bele proteje aan, nomós hanesan parte ida husi desportu nian.
“Ha’u orgullu tama iha kera sakit, tanba ha’u feto bainhira la’o mesak iha kalan ka loron ema ruma ne’ebé rai odiu mai ha’u hodi estraga ha’u, ha’u mos prontu hasoru sira,” nia hateten.
Nia dehan dala-barak ema sempre dehan arte marsial sira maka halo problema, ida ne’e sala tanba tuir treinu ida ne’e la’os atu baku malu no tebe malu, maibé ida ne’e atu bele proteje aan husi ema seluk.
“Ha’u nia mensajen, ita feto mós iha direitu atu tuir organizasaun, para ita lao bam ai iha kalan ka loron ema hanoin aat mai ita atu estraga ita karik, ita mos pronto hasoru sira,” nia hato’o mensajen ba publiku.
