Reportajen Silvino Freitas
Estadu Cuba hato’o felisitasaun ba parlamentu nasionál hodi nafatin halo kooperasaun entre estadu Cuba no Timor-Leste nune’e kontinua foku ba area saúde nian, tanba ne’e iha tinan 2023 ne’e estadu Timor-Leste hala’o pedidu, hodi haruka ona espesialista saúde nian hamutuk 48 hala’o hela estudu iha Cuba kona-ba espesialidade onkolojia no enfermeiru.
Hafoin hasoru malu ho Prezidente Parlamentu Nasionál Maria Fernanda Lay embaixadora Cuba Grisel Alina Aldama hateten, hasoru malu ho Prezidente Parlamentu Nasionál hodi hato’o karta felisitasaun husi prezidente assembleia jerál Cuba nia liga ho nomeasaun ba prezidente parlamentu foun Timor Leste nian, nune’e mós Cuba informa ba prezidente kona-ba amijade entre grupu parlamentu cubanu ho Timor Leste.
“Kooperasaun iha area saúde nian sei la’o nafatin ba oin no dadaun ne’e iha espesialista saúde nian hamutuk nain 48 dadaun ne’e estuda hela iha Cuba” dehan embaixadadora Cuba Grisel Alina Aldama hafoin hasoru malu ho PPN Maria Fernanda Lay, (13/09).
Nia dehan tan, husi espesialidade saúde ne’ebé dadaun ne’e hala’o estudu iha Cuba ne’e maka iha area onkolojia no enfermeira, sira estuda espesialidade ne’e bazeia ba pedidu husi estadu Timor Leste nian, nune’e mós husi parlamentu Cuba mós nafatin iha disponibel atu halo kooperasaun ho parlamentu Timor Leste tanba ne’e embaixada Cuba hato’o ona karta formál kooperasaun nian ba PPN Maria Fernanda Lay.
