Home Notisia Estudante Manufahi Oan Kondena no Husu Investiga Aktus Polisia Militár Tiru Mate...

Estudante Manufahi Oan Kondena no Husu Investiga Aktus Polisia Militár Tiru Mate Komunidade Nia Karau

1245
0
Estudante Manufahi halo konferénsia imprensa. [Foto: Agustinha | 13.09.2023]

Reportajen Agustinha Amaral

Movimentu Estudante Juventude Munisípiu Manufahi (MEJMM) kondena membru Polísia Militar (PM) ne’ebé uza armas estadu hodi tiru mate komunidade nia Karau, kondena mos veteranu balu ne’ebé sai matadalan ba membru Polisia Militar ba aktus ida ne’e, mak akontese foin lalais iha Suku Betano, Munisípiu Manufahi.

Tuir Porta-voz Antonio Rebelo Mendes informa, movimentu estudante munisipio manufahi lamenta tebes ho aktus hirak ne’ebé mak akontese hodi hamate komunidade sira nia Karau iha Suku Betanu, aldeia selihasan. Akontesementu ne’e komunidade sira kaer toman iha dia 10 de setembru 2023, mais ou menus tuku tuku 04:20 madrugada, iha dalan kruzamentu entre mota kelan no feriksare.

Tuir informasaun no kronolojia ne’ebé mak iha katak, aktu ba uzu kilat ka arma pezada ba kasa ou tiru komunidade nia animal hakiak ne’e la’os foin mak akontese maibé dala neen (6) ona, ho nune’e obriga karau na’in sira kalan-kalan tenke ba toba hein karau iha karau luhan.

“Tamba ne’e ami husi Movimentu Estudante Munisípiu Manufahi, ami kondena i lamenta tebes ho aktu ne’ebé mak komete husi oknum Polisia Militar ho oknum veteranu ne’ebé mak oho karau hakiak no animal fuik sira iha Munisípiu Manufahi”, dehan Porta-voz MEJMM, iha CNJTL, Farol, Kuarta, 13/09.

Nia hatutan tan, uza armas estadu nian atu hodi asegura povu husi konflitu ruma ne’ebé mak akontese iha rai laran, la’os ba oho fali povu sira nia rikusoin ne’ebé mak hodi sustenta familia.

“Oknum refere ne’ebé mak uza aramas pezadus hodi oho povu nia animal, kontra teb-tebes ona lei ambiental nian no oknum veteranu ne’ebé sai matadalan ba oknum Polisia Militar ne’ebé hodi oho karau povu nian kontra ona prinsípio luta na’in sira nian katak liberta patria no liberta povu.” porta-voz lamenta.

Nia mos lamenta ho guarda florestal munisípiu Manufahi la profisioinal hodi halo prevensaun ba kasa ilegal sira ne’ebé mak uza tempu kalan hodi oho povu sira nia animal no animal fuik sira ne’ebé sai hanesan rikusoin nasaun nian. iha akontesimentu ida ne’e oknum ilegal sira konsege tiru mate komunidade sira nia animal hakiak sira hanesan karau no animal fuik sira hanesan rusa.

 Estudante sira ne’e husu Órgaun no lnstituisaun relevante sira hanesan Prezidente Repúblika, Komandu Falintil-Forsa Defeza Timor-Leste (F-FDTL), Parlamentu Nasional (PN), Provedoria dos Direitus Umanus no Justisa (PDHJ) no Konsellu Veteranus Timor-Leste atu halo investigasaun ba membru Polisia Militar no membro veteranus ne’e.

“Ami husu baPrezidente da Repúblika hanesan mos Komandante da Supremu, atu halo xamada atensaun ba autoridade militar sira ne’ebé uza armas povu nian hodi ba oho povu sira nia animal, ami husu ba Komandu F-FDTL atu foti medida hasoru oknum Polisia Militar ida ne’ebé uza armas povu nian hodi ba oho povu nia animal, husu ba Prezidente  Konsellu Veteranus Timor-Leste atu xama atensaun ba oknum veteranu ida ne’ebé sai hanesan matadalan hodi la’o hamutuk ho oknum Polisia Militar ida ba oho povu nia animal, husu ba Parlamentu Nasional liu husi komisaun B, atu halo fiskalizasaun ba erru ne’ebé akontese iha munisípiu Manufahi, tanba kartús ne’ebé uza hodi oho povu sira nia animal ne’e uza povu sira nia osan hodi sosa.”

“Husu ba Ministériu Defeza, atu halo atuasaun rigor ba oknum ida ne’ebé utiliza armas hodi oho animal povu sira nian, husu mos ba Ministériu Agrikultura liu husi Sekretáriu Estadu Florestas atu kondena oknum sira ne’ebé utiliza armas povu nian hodi oho animal tuir lei ne’ebé mak vigor ona iha Ministériu relevante”, nia subliña

Sira husu mos ba Provedoria dos Direitus Humanus no Justisa (PDHJ) atu halo investigasaun profunda ba kauza ne’ebé oknum sira oho animal iha munisípiu Manufahi no rezultadu investigasaun tenke publika.

Print Friendly, PDF & Email

LEAVE A REPLY

Please enter your comment!
Please enter your name here