Reportajen Filomena da Conceição
Primeiru Vise-Presidente Assuntu Administrasaun-Conselho dos Combatentes da Libertação Nacional (CCLN), Birgadeiru Jenerál João Miranda Aluk Decart, hala’o Inkontru ho Presidente Da República José Ramos-Horta ligadu ho serimonia 28 de novembro atu kondekora Timoroan nain 2000 iha loron 28 Novembru 2023.
Primeiru Vise-Presidente Assuntu Administrasaun-CCLN, Birgadeiru Jenerál João Miranda Aluk Decart, hateten, CCLN iha ideia prinsipál tolu ne’ebé mak ohin lori mai hodi hasoru Presidente da Repúblika José Ramos-Horta, liuliu kona-ba serimónia 28 de Novembru nian agora ne’e.
“Hau hanoin serimónia ba dia 28 de Novembru agora, atu kondekora ita nia maluk sira ne’ebé mak uluk partisipa iha prosesu funu naruk nian, maibé seidauk hetan oportunidade hodi hetan kodekorasaun,” dehan Vise-Presidente Assuntu Administrasaun-CCLN, Birgadeiru Jenerál João Miranda Aluk Decart, ba Jornalista sira iha Palácio Presidensial, Bairo-Pite, Tersa 14/11.
Nia haktuir, sira lori mós lista ida husi veteranos sira ne’ebé maka uluk fó ninia partisipasaun ba prosesu funu iha diaspora, iha frente externa.
“Iha interna balun ita so bele rona deit naran maibé ita la hatene katak ema ne’e sé, no ema hotu hatene katak uluk, ita nia Presidente da Repúblika, iha prosesu funu naruk nia mak iha liur ne’ebá, sai representante espesiál iha rai liur no nia mak koinese diak liu ema sira ne’e, tanba ne’e mak ami lori lista ne’e mai atu presidente bele komfirma,” nia esplika.
Nune’e mós lori lista ba sira ne’ebé husi konsellu nian atu husu apoiu husi presidente da República ba iha Munisípiu sira atu bele fahe medaillas ba ema sira ne’ebé mak hetan kondekorasaun.
Enkuantu Conselho dos Combatentes da Libertação Nacional (CCLN), rekoilla ona número totál husi nivel nasional hamtuk 2000 pessoas atu hetan kondekorasaun refere iha serimonia 28 de novembro iha tinan ida ne’e.
