Reportajen Umbelina dos Reis
Relasiona ho preokupasaun vendedór fa’an ikan sira ne’ebé la satisfas ho kondisaun fatin fa’an ikan nian iha merkadu Taibesi tanba fasilidade ladun di’ak hodi hato’o sira nia preokupasaun liu hosi konferénsia imprensa, Xefe Departamentu Jestaun Merkadu Munísipiu Díli, Gaspar da Silva hateten, fasilidade uluk kompletu maibé tanba ema nia konsiénsia menus mak agora avaria hotu.
“Fatin merkadu Taibesi momentu primeiru utiliza ne’e fasilidade kompletu maibé ita Timor nia karakter ne’e hakarak fa’an buat ruma tenki rendimentu sa’e, karik laiha entaun fatin ne’e abandona, tanba ne’e mak foti inisiativa rasik nune’e sira mai fa’an hotu iha fatin refere.” Dehan Jestor Merkadu Taibesi.
Nia dehan, sira rekoñese katak merkadu Taibesi menus bee-moos tanba bee bomba avaria, fasilidade haris fatin iha maibé aat hotu ona, nune’e pesoalmente halo pedidu hato’o ona ba parte kompetente maibé até a data seidauk iha responde ruma hosi parte relevante, momentu ne’eba ba koordena ho Bee Timor-Leste (BTL), maibé emprezáriu públiku ne’ebé apoiu dala ida de’it.
“Nune’e komunidade ne’ebé hela iha merkadu Taibesi tenki sosa bee hafoin utiliza ba casa de banho, nune’e moos kada loron sexta-feira parte seguransa sempre avizu ba komunidade ka negosiante hodi limpeza merkadu.”
Iha sorin seluk Vendedór Afonso Casiano Belo afirma, seguransa jestaun merkadu Taibesi la fo espasu sira atu halo konferénsia imprensa tanba sira nota katak naton realoka sira ba merkadu Taibesi Sekretáriu Estadu dehan buat hotu kompletu ba vendedores sira hanesan sanitáriu, bee-moos maibé na realidade fasildade refere laiha.
“Ohin ami vendedores fa’an ikan iha merkadu Taibesi atu halo press konferensia hodi hato’o ami nia preokupasaun maibé seguransa jestaun merkadu la fo espasu dehan labele halo konferénsia imprensa iha merkadu maibé imi bele ba konferénsia imprensa iha imi nia fatin anterior tasi-ibun Bidau Santa Ana, depois haruka media mai foti gambar iha ne’e laiha buat ida maibé konferénsia imprensa iha merkadu Taibesi mak labele duni.” Dehan vendedór, Afonso Casiano Belo ba Neon Metin, iha Bidau Santa Ana, sexta-feira, 19/01.
Nia dehan, fa’an ikan iha tasi-ibun Bidau Santa Ana ne’e diferente tebes fa’an iha merkadu Taibesi, tanba uluk sira faan ikan iha tasi ibun ne’e kada loron hetan rendimentu $200 dolares Amerikanu, maibé faan fali iha merkadu Taibesi kada loron hetan de’it $10 dollares, i dalaruma loron ida ema nunka sosa to’o ikan dodok aat hotu, entaun ami sente triste tebes ho kondisaun refere.
“Ami nia hakarak lo-loos ne’e governu kria fatin dignu ba vendedór fa’an ikan sira karik iha área tasi-ibun, nune’e vendedór sira fa’an ikan karik uza tasi-been tanba kompradores ikan hatene katak ikan ne’e mai hosi tasi laran. Se governu hakarak vendedór tenki fa’an hotu iha merkadu entaun presiza material no kria fatin dignu.” Nia hatete.
