Home Notisia Marta Nu’udar Pintor, nia Pintura Sira Reprezenta Injustisa Sosial Ne’ebé Sei Mosu

Marta Nu’udar Pintor, nia Pintura Sira Reprezenta Injustisa Sosial Ne’ebé Sei Mosu

4651
0
Marta pintor husi grupu Gembel. [Foto: Juvinal | 03.02.2024]

Reportajen Crecênsia de Castro

Dala barak sei mosu hanoin estereótipu katak feto nia knaar mak halo serbisu uma laran ka doméstika, nune’e dala barak espasu ba feto sira, sei kloot oinsá atu partisipa iha prosesu dezenvolvimentu, liu-liu arte.

Jornalista Neon Metin halo entrevista ho joven feto ida ne’ebe ho nia matenek iha mundu arte, nia esperiénsia nu’udar pintór, liuhusi pintura ne’ebé reprezenta duni ninia espresaun konaba injustisa sosiál ne’ebé dala barak povu sei hasoru.

Nia mak Marta dos Santos Freitas, nia aprende oinsá pinta iha grupu arte naran Gembel, nia hetan oportunidade di’ak, tanba bele iha espasu ba nia hodi sai pintór.

Marta hahu involve an ha grupu Gembel, bainhira nia sei tur iha banku sestu ano, nia iha interese los atu sai pintor, nune’e iha momentu ne’ebá tuir kompetisaun kona-ba pintura barak ona.

Iha tinan 2019, nia aprende klean liutan konaba dezenha sketsa iha Care International, no pasa hodi kontinua tuir kompetisaun iha Timor Plaza no konsege hetan terseiru lugar.

“Momentu kompetisaun ne’e hotu, maun sira husi Gembel bolu kedas ha’u atu ba aprende, hodi aumenta tan ha’u nia kapasidade iha area arte nian iha tinan 2019 to agora,”dehan Marta ba Neon Metin bainhira partesipa iha eventu Lu’un Turu-Neon Fitar II farol, Sabadu 27/01.

Nia haktuir durante hola parte iha Gembel nia mós tuir ona kompetisaun balun ne’ebé mak halo ona husi SEJD, Ministériu Turismo, no kompetisaun seluk mós.

Iha prosesu pinta nian, dezafiu oi-oin ne’ebé iha maibé ida ne’e la hamate espíritu atu aprende kona-ba mundu pintor nian, nia rasik dala ruma hasoru obstákulu oin-oin, ema balun hamosu estereótipu ba nia, tanba fila kalan

“Dezafiu ne’ebé maka ha’u hasoru maka, dalaruma ha’u ba tuir kompetisaun ka hetan projetu ruma atu pinta ema nian moru no seluk tan, ha’u fila uma sempre kalan no viziñu sira dehan ha’u feto aat nusa la tur hakmatek no sira mós dehan o pinta deit ne’e atu mana saida. Nune’e mós pinta balun ne’ebe mak ema hameno ona atu halo, maibe to’o fim kansela no la konsege foti, ida ne’e mós sai dezafiu ida ha’u hasoru durante ne’e,”dehan nia.

Nia hatutan dezafiu hirak ne’e la hamate nia vontade atu aprende nafatin no buka osan ba nia nesesidade, no ajuda oituan ba nian inan aman no alin sira nia presiza. Nune’e mós bele hatudu ba ema hotu katak feto iha direitu atu espresa sai nian kriatividade saida mak sira iha.

“Ha’u feto servisu uma laran, no ha’u kaer servisu uma nian, maibé husi ida ne’e ha’u mós iha atividade seluk ne’ebe mak ha’u halo, maka hanesan pinta no ha’u hakarak foku ba saida mak ha’u bele, atu hatudu ba sira katak ha’u bele,” nia espresa.

Marta nia inan aman suporta nia atu dezenvolve liu tan nia talentu iha parte arte nian, no nia la preokupa saida mak ema seluk ko’alia to’o ikus vijinu sira ne’ebe koalia la diak ba nia dalaruma sira mós mai husu atu ba pinta sira nia moru.

Nune’e nia mós husu ba nia feto maluk sira ne’ebé balun kontinua hela estudu no balun para ona eskola, labele moe hatudu talentu no iha kapasidade atu halo buat ruma, halo de’it no keta moe atu espresa sai, kontinua nafatin ho atividade sira ne’ebé pozitivu, hatudu katak feto maibe bele partisipa iha setór hotu, inklui mundu arte

Print Friendly, PDF & Email

LEAVE A REPLY

Please enter your comment!
Please enter your name here