Reportajen Juvinal Cabral dos Santos
Prosesu aprendizajen eskola Ensino Pre-Eskolar (EPE) Abo-Lir, matebian hun Postu Administrativu Quelicai Munisipiu Baucau provisoriu para, tanba manorin nain rua kontratadu tinan 2023 remata.
Manorin kontratadu Duarte Soares hateten, agora aula aprendizajen eskola Ensino Pre-Eskolar (EPE) Abo-Lir la lao, tanba sira nia kontratu remata iha fulan Dezembru 2023, no vaga husi Ministeiru Edukasaun fo sai mos lasimu sira ne’ebé diploma sekundariu, entaun sira nain rua la konkore.
“Ami diploma sekundariu iha dever atu loke escola iha area rural no area urbana sira, maibe IX governu agora lasimu ona ema nia servisu, maibe simu deit ema nia matenek, entau ami para tiha hodi nune governu bele haruka professor mai ita nia area rural sira hodi hanorin dehan Professor Kontratadu Duarte Soares iha Abo-Lir”
Duarte hatutan EPE Abo-Lir gradua dala rua iha tempu sei EPE Komunitariu Abo-Lir, iha tinan 2020 muda tiha ba EPE Publiku sira la halo graduasaun tanba sira nain rua hanorin voluntariu de’it, foin dadauk 2023 sira atu halo graduasaun maibe komunidade hotu-hotu ho razaun dehan edifisiu foun EPE Abo-Lir ne’ebé agora dadaun iha ona faze konstrusaun diak tiha mak halo gradua, ho nune’e mak sira fahe deit sertifikadu ba estudante sira, Professor haktuir
Iha sorin seluk Anita da Conceicao sente triste tanba hanorin durante tinan barak ona, akompanha alin oan sira iha foho matebian hun maibe ministra edukasaun hapara professores kontratadu sira tenke para
“Ministra Edukasaun nia liafuan “Ita boot sira tuir bolsu de kandidatu pasa mak hanorin tan” ami hein anunsiu públiku iha 09/02/2024 bolsu de kandidatu hahu too 19/02/2024 iha momentu ne’eba ami nain rua ba tuir iha dia 11/02/2024 maibe parte husi xefe ekipa bolsu de kandidatu hateten diploma sekundariu la priense rekezitu”, dehan, Professora Ensinu Pre-eskolar Abo-Lir, Anita da Conceicao iha Aldeia Daemena, Suku Abo, Postu Administrativu Quelicai, Munisipiu Baucau, Segunda (19/02/2024)
Relasiona kriteria ne’e sira husu ba xefe ekipa bolsu de kandidatu katak tanba saida sira labele tuir teste sira mos hanorin tinan naruk ona husi 2018 too agora, tanba kriteria edukasaun sira labele kompete
“Iha fulan Janeiru ami registu duni estudante sira nia naran maibe ami rona audensia husi ministra edukasaun katak Professor kontratadu 2023 labele hamriik tan estudante sira nia oin, ho ida ne’e mak ami registo de’it maibe la hanorin, Anita haktuir”
Professora Anita hatutan sira hanorin voluntariu eskola EPE Abo-Lir ho diploma sekundariu maibe hanesan fundadora, tanba eskola ne’e harii husi komunidade sira nia inisiativa rasik hili sira nain rua mak hanorin hanesan mos inan no aman la hetan salariu ruma maibe sira fuan boot hanorin ho pasensia nafatin
“Ami nia eskola nia estatutu sei komunitariu maibe ho esforsu la sente kolen tenke tuir enkontru beibeik iha edukasaun ba ho troka malu de’it, ami nu’udar voluntariu lao ho kesi kabun de’it, maibe nia rezultadu iha 20/10/2020 eskola Pre-eskolar Komunitariu muda ba públiku naran EPE Abo-Lir” dehan Professora kontratadu Anita Soares
Anita haktuir eskola ne’e públiku ona maibe kondisaun eskola tempu udan sei di’ak oituan maibe anin boot prosesu aprendizajen labele lao tanba didin ho kalen barullu ko’alia la rona malu
“Problema sira ne’e ami relata hela de’it ba edukasaun munisipiu nian no inspetor pre -eskolar munisipiu Baukau nian mai observa fulan ida dala ida, konstrusaun kona ba eskola tinan daruak nia kada munisipiu iha entaun problema ne’e ami hatoo mos ba munisipiu Baukau dehan manorin Anita”
Relasiona ho kondisaun dadaun EPE Abo-Lir hetan oportunidade edifisiu foun ba estudante sira iha prosesu konstrusaun nia laran, eskola ne’e hahu iha tinan 2018 eskola EPE Abo-Lir estudante 33, iha 2019 estudante 28, no 2020 ne’e aumenta 30, kontinua 2021 estudante 29, depois iha 2022 nee numeru tun 18 maibe 2023 sae 30 pesoas, dadaun registu iha fulan kotuk ba tinan ida ne’e 25 pesoas grupo A feto nain 3 mane 7, ba grupo B feto nain 7 mane 8 pesoas
Iha sorin seluk reprezentante inan aman Agostinho Soares Freitas hateten EPE Abo-Lir nia professor nain rua mak hetan kontratu iha tinan kotuk 2023 maibe dadaun ne’e governu parte husi ministeiru edukasaun hapara hotu sira nia kontratu prejudika tebes ba sira nia oan.
Reprezentante inan aman Agostinho Soares Freitas. (foto: Juvinal | 23.02.2024)
“Ita nia oan sira bainhira atu hetan estudu ne’ebé mak di’ak tenke iha manorin, ami mos preukupa tebes nune’e se bele karik professores sira ne’ebé kontratu para bele kompete fali bolsu de kandidatu hodi hanorin ita nia oan sira ba futuru sai di’ak dehan Agostinho”
