Reportajen Filomena da Conceição
Reprezentante Primeiru Ministru (PM) Nino Pereira, nu’udar mós actual Ministru Comercio Indústria (MCI) hateten, ema ho defisiénsia hanesan rikusoin ida, tanba ne’e governu nafatin iha planu hodi salva direitu ema ho defisiénsia. Nune’e governu iha planu ona oinsá maka Ema ho defisiénsia iha oportunidade atu asesu ba edukasaun, saúde no oinsá bele asume kargu Xefia sira iha instituisaun sira hotu.
“Planu Governu ba ema ho defisiénsia sira mak oinsá sira bele asesu ba edukasaun, saúde oinsa atu asesu kargu xefia sira iha edifísiu sira, ida ne’e mak planu Governu nian ne’ebé mak hatuur iha Mandatu governu hotu, inklui mós ba governu XI nian”, dehan Nino Perreira, ba jornalista sira iha salaun CRD, Dare, Tersa 27/02.
Nia haktuir, labele halo polítika iha sura-tahan leten, maibé fó oportunidade ba ema ho defisiénsia mak presiza asaun, tanba ne’e labele husik Timoroan sira iha kotuk, sira la presiza koitadu no karidade, maibé presiza fó oportunidade para sira bele asesu edukasaun no asesu ba servisu iha setór hotu. Nune’e mós ema ho defisiénsia hanesan rikusoin ida, tanba sira mós iha kapasidade no abilidade hodi bele presta sira nia servisu iha setór hotu-hotu.
“Oportunidade ida ne’e nakloke no balun hatudu ona ba iha Ministériu Inkluzaun Sosiál, ne’ebé fó mós oportunidade ba ema ho defisiénsia sira, atu bele okupa kargu xefia sira no ida ne’e hanesan asaun konkreta ida ne’ebé hatudu ona inklui mós edifisiu balun Ministériu balun implementa ona”, Nia Esplika.
Nia subliña governu nafatin halo asaun nasionál ida para ema ho defisiénsia mós bele hola parte iha laran, ida ne’e mak bele dehan unifika asaun katak servisu Ministériu hotu-hotu tenke fó oportunidade ne’ebé hanesan ba ema ho defisiénsia sira hotu.
