Reportajen Umbelina dos Reis & Agustinha Amaral
Diretór Eskola Ensinu Sekundáriu Jeral 01 Liquisa, Hu Iso Lara Iso, Januari Dos Santos Barreto hateten, eskola ESJ 01 Liquiça Hu Iso Lara Iso harii 1993, iha tempu Indonézia, maibé to’o agora governu seidauk tau atensaun másimu ba eskola refere. Inan aman kontinua selu eskola kada fulan $2.00 ba profesores voluntáriu sira, no kontinua halo kontribuisaun ba eskola hanesan harii lutu, fura bee-moos no hadi’a haris fatin.
“Eskola ESJ ne’e iha nia paralelu tolu mak hanesan paralelu Maubara estudante hamutuk 656, Bogoro 340, Fatumasse 340 no Central 1786. Professores hosi Central no Fatumasse total 54, Iha Central estudante sira tuir aula de aprendizajem kada loron fahe ba turnu tolu, signifika pre-sekundária primeiru anu aula oras 08:00 – 11:00, segunda aula 12:00 – 03:00, terseira aula 03:00 – 05:00, ho razaun sala de aula la sufisiénte ba estudante sira tanba sala ida iha estudante haat nulu resin.” Dehan Diretor da eskola ESJ 01 Liquiça, Hu Iso Lara Iso, Januario Dos Santos Barreto ba Neon Metin, iha Edifisiu Eskola Liquiça, kuarta-feira 13/03.
Nia informa, sira iha biblioteka maibé menus manual no material eskola nian hanesan meza kadeira no haris fatin, mezmu sira iha ona bee no haris fatin haat, maibé estudante barak demais entaun la dun sufisiente ba professores no estudante sira. Nia rekomenda ba Nonu governu liu-liu ba Ministériu Edukasaun tenki tau atensaun masimu ba eskola públika iha teritóriu Timor-Leste.
“Husu ba gorvenu da-sia se bele tun direita hodi hare kondisaun públika sira, la’os haree ba dadus maibé ekipamentus saída mak falta iha baze, na’i-ulun sira tuur iha leten la hatene. Tanba dezde governu anterior nia tempu kedas promete mai ami dehan hadi’a ami nia eskola maibé até a data buat hotu la tuir orsamentu jeral estadu (OJE) nian”. Nia dehan.
Sorin seluk, Professora eskola ESG 01 de Liquiça, Hu Iso Lara Iso, Julmira de Araújo Castro informa, tuir nia observasaun konabá estudante sira nia aprendizajen iha eskola Hu Iso Lara iso Central ho nia paralelu tolu hanesan Maubara, Bogoro no Fatumasse ne’e buat hotu la’o di’ak maibé menus professores no menus material eskola nian.
“Pesoalmente hanesan voluntária tinan haat ona hanorin iha eskola ESJ 01 Liquiça nia paralelu Fatumasse maibé sente triste oituan tanba governu seidauk rekoñese hanesan manorin, maibé iha parte ida sente kontente tanba mezmu sei iha faze voluntária maibé agradese tanba bele hanorin estudante no fahe esperiénsia ba maluk sira tanba ida ne’e mak ami nia knaar nu’udar manorin.” Dehan profesora Julmira ba Neon Metin iha edifísiu eskola ESG 01 Liquiça Hu Iso Lara Iso Central.
Nia dehan, sira hahú submete ona dukumentu iha vaga forsa kandidatu ba professores sira nian, espera bele pasa nune’e kontinua hanorin iha eskola refere. Karik sira la pasa sente triste tanba estudante iha eskola ne’e barak liu no menus professores, dala-ruma materia balun la’os profesores nia área maibé tanba de’it profesores menus entaun sira tenki esforsu hodi hanorin nafatin.
“Ita hotu hatene buat hotu tuir nia prosesu no tempu maibé nu’udar voluntária tenke mantein nafatin fuan boot hodi nune’e koñesimentu ne’ebé mak iha prontu atu oferese no halo sakrifísiu ba alin estudante sira, mezmu seidauk rekoñese hosi estadu maibé knaar manorin ne’e mos pas parte kontribui ba ita nia nasaun.” Nia dehan.
Nune’e, estudante Juvita Galucho Coreia hatete, senti triste tebes tanba eskola refere kondisaun di’ak maibé menus tebes sala de aula no eskola iha ona biblioteka maibé menus manual hanesan livru balun, nia dehan problema sira estudante barak demais iha sala de aula entaun susar ba sira aprende no simu esplikasaun tanba sala ida estudante kuaze haat nulu resin. Entaun susar ba sira simu aprendizajen hosi professores sira.
“Ami presija professores sira ne’ebé iha área Inglés no professores Matemátika tanba professores voluntária de’it mak hanorin nune’e sira iha preokupasaun ruma karik la mai hanorin no husik abandona ami estudante sira de’it. Nune’e nu’udar estudante sente triste.”
