Reportajen Zemila Calau, Filomena da Conceição
Governu liuhusi Ministeriu Komersiu Industria (MKI) hamutuk ho Banku Mundial lansa ona Portal Informasaun no Komersial, hodi publikasaun informasaun sira relasiona ho merkadu global, regional no oinsa tulun setor privadu sira atu halo negosiu.
Liuhusi seremonia lansamentu Ministro Komérsio no Indústria, Filipus Nino Pereira hateten, mportansia husi portal informasaun ba komersiu iha Timor-Leste nian, hodi fasilita informasaun ne’ebé maka kredivel, konfiadel hodi bele garante transparensia informasaun ne’ebé mak lolos mai husi autoridade governo nian, nune’e sei fó sai kona-bá Lei regulamentu, prosedimentu ba atividades komersiais, nune’e komunidade komersiais setor privadu sira bele hatene prosesu atividade exportasaun no importasaun nian, prosesu ne’ebé mak sira lao tuir, tanba ita interligadu ho linhas ministeriais sira.
“importante teb-tebes atu ambiente ecosistema negosio ne’ebé mak bele tuir duni padraun internasional, tanba ohin loron ita koalia ona ita nia Adezaun ba ONK ne’ebé mak presiza rekizitu lubuk ida atu bele garante, liuhusi portal informasaun. Portal ida ne’e hodi fornese informasaun ne’ebé mak lolos nune’e bele fasilita diak liutan ita nia setór privadu sira halao negosio ne’ebé mak saudavel, negosio ne’ebé mak nakloke ba rai seluk, bele akompanha e bele atrai mós investimentu mai ita nia nasaunr rasik,”dehan Ministro Filipus Nino Pereira iha salaun GMNT, Quinta 11/04
Nia salienta katak hodi bele garante existensia husi portal ne’e rasik, ninia prosesu inisiu envolve kedas Timor oan lubuk ida iha laran. Governu prepara ona rekursus humanu liuliu husi parte IT nian, no oinsa bele garante servisu hamutuk ho Banku Mundial no sustentabilidade.
Entertantu Global Lead iha Banku Mundial, Bill Gain informa portal informasaun, nu’udar komersial portal ida ne’ebe kritikamente muda ita nia exportadores no importadores sira, atu bele komprende kona-bá prosesu prosedimentu no regulamentasaun hotu, relative ho regime komersiu iha Timor-Leste.
Bill gain nudar Global Lead.[Foto: Mila | 11.04.2024]
Nia dehan mos responde ba oinsa governo Timor-Leste hatur nia ho prosedimentu ho regulamentu sira ne’ebé mai husi World Trade Organization (WTO) no Association of Southeast Asian Nations (ASEAN), tanba presiza mós rekirementu ka prosedimentu balu ne’ebé Timor-Leste halo.
Nia konklui, liuhusi portal ne’e nia sei fó benefisiu barak ba setór privadu sira, tanba portal ne’e fó informasaun kona-bá merkadu global no merkadu regional mós, portantu liuhusi portal ne’e ita bele hatene informasaun ne’ebé ke ita nia setór privadu sira presiza atu halo sira nia negosio.
