Reportajen Joselina dos Santos
Bailoron naruk, bee matan maran maibe nesesidade obriga Domingas husik nia bebe toba mesak iha uma, hodi ba koru bee iha bee matan Du’u-Ira. Problema seluk ne’ebé durante nia hasoru mak ba koru bee tuku 5:00 lokraik, fila husi bee matan derepente sidi balde monu nakfera, no bee iha masa nakfakar entaun pasiensia fila ho masa mamuk.
Domingas Gusmão (40), hatete tempu uluk bee matan maran, komunidade sira ba koru bee iha bee matan kuaze durante oras ida, maibe tan de’it bee matan dook, entaun laen ho oan sira mak sempre tulun ba kuru bee, ema ida lalin masa rua ka tolu sente todan loos, tanba husi uma ba bee matan ne’e lao tun de’it, maibe fila husi bee matan ne’e la’o sa’e fali rai lolon entaun hakarak ka lakohi tenke la’o kuaze oras ida.
“Durante ha’u isin-rua, laen mak ajuda ha’u, antes ba servisu prioridade primeiru mak bee entaun nia sai uma hahú husi tuku 5:00 dadersan madrugada, hafoin ba servisu, bainhira tama ona ba tempu bailoron naruk,, ami susar loos atu asesu ba bee entaun labarik sira ba eskola dala ruma sira la hariis maibe hamoos oin de’it”, dehan, Domingas iha Aldeia Samagata, Suco Sagadate, Postu-Administrativo Laga Município Baucau, 10/10.
Nu’udar inan sente triste tebes, esperensia ne’ebé durante nia hasoru katak problema bee ne’e sai difikuldade boot, tan bee nia husik nia oan ho viziñu ka banin sira mak hein, pior liu bainhira viziñu no banin sira ba to’os ka natar obrigatoriu husik toba mesak iha uma laran, mak akontese bebe monu husi kama leten entaun mosu violensia entre fen no laen maibe pasiénsia simu ho nonok agradese tanba bebe la hetan buat ruma.
“Liga ba problema bee ne’ebé hamosu violensia entre fen no laen, labarik monu no ema balun hapara eskola tan bee, nune komunidade hamutuk ho grupu KEJUSS mai ho inisiativa rasik hodi kee debu primeiru no haforsa bee matan, nia rezultadu mak bee lamaran maibe menus. Liuhosi rezultadu ida ne’e grupu KEJUSS hamutuk ho NGO PERMATIL mai ho ideia ida hodi kontinua kee debu rua hamutuk tolu objetivu atu distribui ba komunidade aldeia rua ne’ebé hela besik” nia informa.
Foun-foun komunidade sira la komprende saida mak debu no benefisiu husi debu mak saida, nune’e sira la satisfas ho grupu KEJUSS nia ideia, maibe no fim sira hetan konvite husi grupu KEJUSS katak komunidade sira tenke ba tuir treinamentu hodi rona informasaun kona-ba kee debu. Iha momentu ne’e sira hetan esplikasaun klaru kona-ba prosesu kee debu no nia benefisiu, entaun komunidade hotu-hotu ba konsentra hamutuk iha bee matan hodi kee tanba lori vantajen lubuk ida ba komunidade hodi sustenta sira-nia moris maske kolen.
“Ami kontente tebes ho sira-nia programa ne’e, maske liuhosi prosesu naruk no kuaze tinan ida ho balun, maibe rezultadu husi kee debu mak dadaun ne’e ami uza iha bailoron naruk hodi konsumu ba nesesidade nomos kuda modo espera katak bailoron naruk bee sei la maran. Maibe sente triste tan maluk balun nafatin la’o dook ba koru bee nomos sosa bee, tanba bee refere koserva de’it ba komunidade balun de’it laos maioria, espera katak ami nia preokupasun ne’e to’o iha parte governu hodi bele responde”
Inacia Manuela Pereira (27) anos, nu’udar joven feto ne’ebé tuir lolos esforsu ba nia estudu iha futuru, maibe tan dook husi bee matan no eskola dook nia deside hapara nia estudu iha nivel Sekundária hodi ajuda nia ama hodi koru bee loron-loron, karik nia la ba koru bee nia ama sempre hirus no hakilar.
Inacia Manuela Pereira. [Foto: Joselina]
“Ha’u para eskola tan bee laiha nomos eskola dook, entaun ama ho apa sira suporta de’it maske iha parte idafuan dodok bainhira lakon futuru, maibe ha’u laele halo buat ida. Ema hotu hakarak susesu iha futuru maibe saida mak ita bele halo, dala ruma tuur mesak hamonu matan-wen, hakarak atu eskola no hanesan maluk joven sira seluk maibe antes atu ba eskola tenke ba koru bee uluk aat liu bee matan no eskola mos dook, entaun fila atu ba eskola oras liu ita obria aan ba mos tarde hela de’it ikus tenke lakon vontade”,
Angela da Costa Pereira, (80), haktuir uluk sira susar loos ba bee liu-liu bailoron naruk ba koru bee iha mota lao kuaze 30 minutu, karik hakarak hariis ka fase roupa entaun tenke lori ho kedas roupa hodi hariis no fase roupa. Maibe iha tempu udan entaun sira labele ba tanba mota tun, nune’e tenke buka dalan seluk ba fali bee matan Lobular ne’ebé dook husi komunidade la’o ho kilometru rua ho balun.
Angela da Costa Pereira [Foto: Joselina]
“Bainhira iha tempu udan boot no mota tun ami dala ruma tauk laba koru bee tanba la’o mesak iha ai-bubur laran, entaun ami buka maneira seluk atu hetan bee mak tabun udan been liuhosi kesi ai-tahan ba nu’u hun depois tau balde iha okos tabun hamutuk hodi konsumu, depois udan para mak ami kontinua ba koru bee, durante konsumu udan been laiha reasaun ruma tanba toman ona”,
Iha fatin hanesan, estudante Quibenia da C. Pereira (8), dadaun ne’e hala’o nia estudu iha 2 ̊ Ano iha Eskola Sagrado de Jesus Sagadate katak nia atividade kada loron mak ajuda inan aman koru bee, loron ida nia lalin masa ida ka rua, atividade koru bee dala ruma halo nia ba eskola la hariis nomos ba eskola tarde bei-beik.
Quibenia da C. Pereira (8). [Foto: Joselina]
Abel Jóse Pereira haktuir, nu’udar xefe familia tenke halo mos servisu feto nian, karik iha uma laran mak bee laiha buka solusaun oinsa mak bele ajuda nia parseira hodi ba koru bee, labele dehan atividade uma laran ne’e feto de’it mak tenke halo maibe mane mos bele halo presiza tulun malu.
“Durante ne’e ha’u ajuda ha’u-nia parseira ba koru no fase roupa tanba bee matan dook, dadersan tuku 5:00 madrugada ne’e ha’u komesa sai uma ba koru bee lalin masa walu ense tiha bee depois kesi ba ai mak leba mai uma hafoin ba serbisu”,
Responsabilidade Tekniku Klibur Estudante Juventude Suku Sagadae (KEJUSS), Raimundo Gusmão Pereira katak knservasaun bee iha bee matan Ita-Milari hahú iha tinan 2021 no hetan rezultadu pozitivu, entaun bee ne’e tau hamutuk iha tanki rezervatoriu iha fatin Daragua tinan 2022 hodi fornese ba komunidade uma kain haat, maibe la to’o ba komunidade sira ne’ebé dook husi konservasaun bee, espera katak governu tau atensun ba problema bee iha futuru.
Iha sorin seluk, Chefe Suco Sagadate, Postu-Administrativo Laga, Município Baucau haktuir loos duni iha Suku Sagadate hamutuk aldeia sanulu resin ida (11), maibe aldeia rua mak seidauk asesu ba bee inklui eskola nomos Centro Saúde. Nune’e nu’udar autoridade sei esforsu nafatin ba komunidade nia preokupasaun, tanba dadaun ne’e suku iha ona orsamentu oituan husi PNDS ne’ebé espesial ba bee, entaun agora hahú halo negosiasisaun hodi reabilta bee husi One-Bu’u hodi distribui ba komunidade maibe tenke bazeia ba finansa.
“Ha’u agradese ba grupu KEIJUSS no NGO PERMATIL ne’ebé mai ho matenek rasik liuhosi tekniku lokal halo konservasaun ba bee hodi oferese ona komunidade balun nu’udar ema presiza tebes bee, ne’e duni nu’udar autoridade bazeia ba kbiitt ne’ebé iha, tanba bee maran ne’e depende ba klima, nune’e ami sei halo pedidu ba parte governu hodi bele konsidera no resolve”.
Artigu ne’e hakerek nu’udar parte husi Media Tour ne’ebe Asosiasaun Jornalista Timor Lorosa’e kolabora ho Oxfam iha Timor-Leste no hetan fundus husi Oxfam Hongkong
