Reportajen David da Costa
Konsellu Imprensa Timor-Leste (KITL), no Polisia Nasional Timor-Leste (PNTL), ohin asina nota entendimentu atu hametin liberdade imprensa no liberdade espresaun iha Timor-Leste. Nomós konsensializa sidadaun sira ne’ebé hala’o knaar iha area jornalizmu atu kumpri Lei.
Presidente Konsellu Imprensa Timor-Leste (KITL), Otelo ote hateten, ohin Konsellu Imprensa ho Polisia Nasional Timor-Leste (PNTL) asina Nota entendimentu kona-ba oinsa atu hametin Liberdade Imprensa no Liberdade Espresaun iha Timor-Leste. Eventu ida ne’e, eventu ida ne’ebé importante tebes no istoriku iha relasaun institusionál entre KI no PNTL.
Noto entendimentu ne’e atu artikula sira tuir Lei, protesaun ba Liberdade Imprensa no Liberdade Espresaun, nomós konsensializa sidadaun sira ne’ebé hala’o knaar iha area jornalizmu atu kumpri Lei.
“Ho nota entedimentu ida ne’e sei lori ita atu koinesementu hamutuk, entedimentu hanesan kona-ba meus komunikasaun sosial kona-ba pratika jornalistika, kona-ba oinsa Polisa sira atu atua kazu sira ne’ebé relasiona ho produtu jornalistiu,” dehan president Konsellu Imprensa (KI) Otelio Ote, iha salaun enkontru KI, Kintal Boot, kinta 21/011.
Nia konta, Iha 2019 kopersaun ida ne’e konsentra liu ba sosializasaun lei meus komunikasaun sosial, hafoin tinan hirak liu ba KI presiza tebes atu eleva nota entendimentu ida ne’e, Tanba nia benefisiu ne’e ba ema hotu, laos ba jornalista no PNTL deit.
“No nia pratika sei lori benefisiu ba ita hotu, la’os deit ba jornalista sira, maibé mos ba instituisaun PNTL no nian membru sira hotu. Atu ita asegura ezistensia media, asegura no aforsa Liberdade imprensa, no asegura espirtiu partesipasaun komunidade sira ba iha prosesu dezenvolvimentu no atu haburas demokrasia,” Otelio esplika.
Komadante Jerál PNTL, Komisáriu Jerál Henrique da Costa, Haktuir mós, Akordu ohin asina ne’e, la’os buat foun ida, maibé iha tinan 2019, komandante Jerál PNTL sesante, Komisáriu Jerál Faustino da Costa, asina uluk ona ho Presidente KI sesante Vergilio Guterres, no akordu ne’e remata ona, entaun liuhusi Komadante Jerál PNTL foun ho Presidente KI foun, presiza haree hodi asina fali akordu foun.
Maibé molok asina akordu ne’e parte juridiku husi Polisa Nasional Timor-Leste (PNTL) ninia no juridiku husi parte Konsellu Impresa (KI) ninia, sira tur hamutuk hodi haree no ohin parte rua ne’e bele asina akordu foun ne’e oinsa maka atu hametin Liberdade Imprensa no Liberdade Espresaun iha Timor-Leste.
Nia esplika, pontus importante iha akordu ne’e, haree liu ba oinsa bele halo formasaun ba iha Jornalista no Polisa Nasiona Timor-Leste (PNTL), atu nune’e PNTL bele hatene kona-ba papel servisu Jornalista nian nomós Jornalista mós bele hatene papel servisu PNTL nian. Tanba papel PNTL ho Jornalista ne’e importante hotu.
“Hau sente katak parte rua ne’e importante hotu, ida hala’o servisu seguransa ninia, no ida mós halo kobertura para nune’e pasa informsaun ba iha públiku, tanba publiku sira presiza informsaun ne’ebé maka loos, atu nune’e sira bele akompaña informasaun,” nia dehan.
