Reportajen Joselina dos Santos
SECOOP-CRS Asina MoU Kona-ba Área Kapasitasaun hodi Apoiu Grupu Kooperativa iha TL
Secretario do Estado de Coperativa (SECOOP) servisu hamutuk ho Catholic Relief Services-Timor-Leste (CRS-TL), realiza seremonia asina MoU kona-ba área kapasitasaun no dezenvolvimentu organizasaun, atu apoiu ba grupus kooperativas ne’ebé eziste hodi implementa setor ekonómiku rai laran . Tanba asuntu kooperativa ne’e importante ba populasaun sira hodi hasa’e sira-nia kresimentu ekonomika iha familia.
Secretário do Estado de Cooperativa (Secoop) Arsénio Pereira da Silva hatete, assiatura entre Secoop no CRS ne’e laos primeira vez maibe durante ne’e sira mos asina ona ho ajénsia lubuk ida, hodi halo implementasaun ba programa sira kona-ba kooperativa nian. Tanba nia finalidade ba implementasaun progama sira ne’e atu dezenvolve setor ekonómiku, nune’e ema hotu bele moris diak liu-liu asuntu kooperativa liga ho ekónomiku ne’ebe uza ho liña ministeriu sira seluk atu fasilita ba grupus kooperativa sira ne’ebé dadaun ne’e eziste ona.
“Ami servisu hamutuk ho CRS atu bele kontinua apoiu grupus kooperativas sira ho sustentabilidade ba organizasaun jesataun no finanseiru nian, atu hatene rendimentu sira ne’ebé mai hosi membru sira hodi kontribui ba ekonomia iha nivel makro nian, tanba ida ne’e asuntu importante loos ba ita nia nasaun. Ezistensia husi koperativa primaria sira ne’ebé iha teritoriu laran hamutuk 200 koperativas, ema ne’ebé partisipa ativu mak hamutuk 37 mil ho kapital sira ne’ebé iha bazeia ba dadus”, dehan Arsénio iha edifisiu Secoop Akait, 02/12.
Governante ne’e salenta, Karik buat ruma mosu presiza sobrevive nafatin iha kapital mesmu hahú ho kiik, tanba iha regulamentu ne’ebé hakesi hodi garantia no sai hanesan poupansa ba nia membru sira, bazeia ba dekretu lei no. 27/2017. Katak ramus koperativas ne’e hamutuk 16 mak hanesan kreditu ensinu, peskas, agrikultura, industria, artezenatu, multi-sektoral no turizmu. Orsamentu ne’ebé apoiu ba grupus koopetariva sira hamutuk um milhão ceis centa mil direita ba benefisiariu sira. Maibe nia rekejitus mak sira tenke submete proposta ba benefisiaria sira tuir matadalan Secoop nian.
Iha fatin hanesan, Country Manager CRS Yane Tamonob Pinto hatutan, atividade ohin mak CRS ho Secoop servisu hamutuk oinsá atu suporta toos na’in sira ne’ebé hakarak envolve iha kooperativa atu hetan suporta tekniku husi Secoop no CRS. Tanba CRS hanesan organizasaun internasional husi EUA ne’ebé harii ona toos na’in ho naran grupu rai osan no empresta osan komunidade nian, programa hiran ne’e halao ona iha munisipiu 5 mak hanesan Baucau, Viqueque, Lospalos, Liquiça, Bobonaro.
“Ami servisu hamutuk ona ho grupu toos na’in hamutuk hatus hitu walu-nulu resin-haat ho total membru kada grupu 20 to’o 25, ne’e sira rai osan depois empresta husi grupu ho funan ne’ebé deside hamutuk, tanba kada grupu iha ona estatuto. Aleinde sira mos halo boot sira-nia grupu atu fó benefisiu ba ema seluk iha sira-nia suku, nune’e ami halo aprosimasaun ho ekipa Secoop hodi realiza hamutuk no sei fó treimentu ba sira. Orsamentu hirak ne’ebé ami apoiu bazeia ba programa no kapasidade sira nian, atu bele dezenvolve grupu kooperativa sira iha rai laran”, Nia dehan.
