Reportajen Silvino Freitas
Estudante finalista Leonisia da Cruz husi Departamentu Kontabilidade Universidade Nasional Timor-Lorosa’e (UNTL) apresia tebes ho inisiativa Fundasaun Haburas nian neebe lori estudante husi Melbourne Australia nain 14 mai halo study-tour iha timor leste, tanba nia bele gaña esperensia husi sira, nunee nia husu ba komunidade, sosiedade sivil no governu atu bele moderniza diak liu tan infraestrutura atu bele fasilita vizitante sira neebe vizita no Fundasaun Haburas atu bele esplora iha fatin seluk iha timor leste, labele iha maubisse no atauro deit.
Estudante Leonisia da Cruz dehan, durante sira nia akompanamentu ba estudante sira husi Melbourne sira iha difikulade uituan iha komunikasaun nian tanba ba dalauluk sira halao viajen ho estudante sira programa study-tour iha atauro no maubisse, nunee sira nia vizita iha atauro nia mos sente no aprende oinsa kultura moris komunidade nian iha illa atauro nian no komunidade halo interasaun ho ema seluk nunee sira nia kultura atu preserva ambiente rasik, tarabandu no sistema kazamentu neebe prenda ema feto ho mane.
“iha maubisse hau aprende liu mak istoria sira mos iha aiknanoik ida neebe husi bizavo avo too beioan sira neebe fo reflesaun ho objetivu harii sira nia uma-lisan” dehan estudante Leonisia husi UNTL, (13/07).
Nia dehan tan, iha viajen hamutuk estudante husi Melbourne nee nia mos infrenta dezafiu balun maka lian neebe diferente kultura mos diferente difisil atu halo interasaun no komunikasaun ho komunidade sira, husi viajen neebe sira halo durante loron 8 sira lao iha ambiente ho klima neebe la hanesan lori sira halo interasaun neebe diak ba sira nia relasaun entre estudante timoroan no australianu sira, nunee nia mos konsidera atividade neebe sira lao laiha dezafiu neebe boot ba nia tanba nia hanesan timoroan kontente tebes bainhira lao ho sira no aprende ho sira no bele hetan esperensia husi sira konaba study-tour.
“hau observa iha atauro no maubisse nee fatin potensial ba turismu nee barak maibe fila fali ba edukasaun iha area rural nee edukasaun menus tebes kompara ho Dili, tanba nee mak iha futuru nee tenke dezenvolve diak liu tan edukasaun atu nunee ema bele iha neon nakloke ba area turizmu nian” dehan Leonisia.
Nunee nia rekomenda ba governu no sosiedade sivil Fundasaun Haburas katak iha viajen estudante sira nian nee sira infrenta dezafiu balun nunee nia husu ba governu atu bele hadia no tun direitamente ba iha baze hodi bele hatene direitamente saida mak presiza halo ba seitor turismu nian, nunee nia mos husu ba fundasaun haburas atu labele esplora deit iha maubisse no atauro maibe presiza mos esplora iha fatin seluk neebe iha mos turismu hanesan ho maubise no atauro.
Komunidade local husi maubisse Jorge Lopes dehan, iha ema husi railiur ona barak mak halao vizita ba sira nia uma lisan iha maubisse nuudar turizmu kultura ida, nunee bainhira ema halao vizita ba sira nia uma lisan sira aprezenta ba sira serimonia ritual, dansa tradisonal no istoria sira tuir realidade husi beiala nian.
“wainhira sira vizita iha nee ami aprezenta ba sira no sira mos husu opiniaun ba dezafiu sira neebe infrenta nunee iha konkordansia hamutuk ba futuru ami bele hadia” dehan Jorge.
Sosiedade Sivil Fundasaun Habural liuhusi director Pedrito Vieira mos rekonese nasaun iha dezafiu boot iha area infraestrutura atu fasilita vizitante sira husi rai-liur tanba nee komunidade sira neebe hela iha baze halao atividade ekonomia turizmu no governu liuliu ministru turizmu bele halao vizita no hakbesik mai komunidade neebe durante nee dezenvolve an iha seitor turizmu atu bele fasilita no apoiu sira.
“governu presiza kapasita joven sira nunee sira sai matadalan ba turista sira ka ema husi railiur mai vizita sira, governu mos presiza apoiu no promove fatin sira neebe prepara ba bainaka sira” dehan Pedrito.
