Reportajen Silvino Freitas
Relasiona ho politika parlamentu nasional neebe atu sosa karreta prado unidade 65 ba deputadu sira maka estudante Fakuldade Siensia Sosiais no Politika Universidade Nasional Timor Lorosa’e (FCS-UNTL) husu atu deputadu sira deskuti hodi resolve uluk problema nesesidade povu nian antes halo politika hodi sosa karreta, no estudante sira konsidera konkordansia Prezidente Republika Ramos Horta nian ba politika sosa karreta prado tanba tauk deputadu sira la afavor ba viajen internasional.
Estudante Mauseso Namo Seran dehan, dadaun nee timor leste laiha ona osan neebe atu tama tan ba kofre estadu tanba orsamentu estadu neebe antes nee ita simu husi fundu petrolifero nee nee halo tiha ona desmantelamentu, nunee politika atu sosa prado no subsidiu ba deputadu sira sei lori timor leste ba rainaruk fiscal inklui sei hamate povu no nasaun timor leste, tanba nee disizaun neebe parlamentu dadaun nee halo la reflete kondisaun povu nian.
“karreta neebe antes iha periodu liu ba sosa nee sei diak afirmasaun balun dehan katak kareta neebe dadaun nee uza sei fo fila fali ba membru governu sira entaun karreta nee sei diak hela, nunee ami hanoin katak politika sosa kareta prado nee la nesesariu la justu hodi reflete povu nia moris neebe ohin loron edukasaun hakadasak” dehan Estudante Mauseso Namo Seran liuhusi konferensi imprensa iha kapus FASPOL Kaikoli, (03/04).
Sorin seluk estudante Marcelino de Jesus dehan, relasiona ho prezidente republika neebe konkorda politika sosa prado unidade 65 ba deputadu sira nee prezidente republika la haree ba klean ba problema social neebe sosiedade infrenta, nunee mos prezidente republika tauk iha konvite internasional sira deputadu sira la fo votus afavor ba nia viajen, prezidente mos la haree problema mal nutrisaun neebe dadaun nee timor leste infrenta.
“sira ho razaun parlamentu nuudar orgaun soberania segundu atu fiskaliza maibe dadaun nee ita haree deputadu ida iha baze neeba, baa mi deputadu sira presiza haree klean ba problema kiak multidimensional ohin loron sosiedade infrenta” dehan estudante Marcelino de Jesus.
Marcelino de Jesus konklui, deputadu sira neebe tuur iha parlamentu nee reprezenta povu neebe povu eleje liuhusi partidu politiku maibe desizaun neebe deputadu sira halo nee hatudu katak deputadu sira neon laiha, laos dehan la konkorda atu sosa kareta maibe presiza hadia uluk infraestrutura bazika sira inklui estrada antes sosa karreta, resolve uluk nesesidade povu nian antes sira sosa karreta neebe dadaun nee sira halo hela politika iha parlamentu nasional, povu bele asesu ona ba edukasaun estrada saude maibe realidade neebe dadaun nee ita haree hela povu sei terus hela, numeiru dezempregu neebe kontinua as hodi lori joven sira ba buka servisu iha railiur.
