Reportajen Adroaldo “Saretukau”
Ekipa kompañia Down to Earth sai kampiaun ba taxa “Ord Valley Cup” 2025 ne’ebé hala’o iha Ord River Magpies Football Club, Kununurra, Western Australia, mak organiza hosi to’os na’in sira.
Reprezentante organizador, Empregador kompañia Bothkamp, Christian Bloecker, hatete, jogu ida ne’e hanesan parte ida hodi anima traballador Timor-oan sira mak servisu iha Kununurra.
“Tinan-tinan, hosi tinan 7 ka 8 kotuk mai, jogu kompetisaun entre kompañia to’os sira, liuliu ba Timor-oan sira, tanba to’os barak iha Kununurra mak Timor-oan sira servisu ba. Entaun ida ne’e hodi anima no kompete mos,” dehan Christian hafoin remata jogu, sábadu, 13/09.
Nia dehan, tinan ida ne’e iha ekipa lima (5) mak kompete, entretantu tinan kotuk iha ekipa ualu (8).
“Jogu ida ne’e hanesan animasaun, tanba sira servisu maka’as iha ne’e, nomos atu halo Timor-oan sira hasoru malu ho sira nia maluk hosi kompañia seluk.” Nia hatutan.
Nia akresenta, jogu ida ohin animadu tebes, tanba sira iha tátika di’ak entre ekipa hodi halo kontra atake ba malu.
“Kampiaun tinan ida ne’e mak ekipa Down to Earth, no sira halakon ha’u nia ekipa Bothkamp, sira joga di’ak tebes iha jogu final”, dehan Christian ho laran triste tanba nia ekipa lakon iha jogu final.
Fatin hanesan, reprezentante ekipa Down to Earth, jogador Simão Ximenes Sarmento, expresa sentimentu kontente tanba sira-nia ekipa sai kampiaun ba tinan ida ne’e.
“Sente kontente tebes tanba jogu ida ohin ita konsege manan ho score 7 a 0, valor ida pozitivu tebes ba ekipa, maske la manan ho osan maibé, sente kontente no orgullu ho jogu ne’ebé ekipa hala’o ho kapas tebes, kontrola bola ho di’ak, final ita manan, primeira vez iha Kununurra Down to Earth marka istória ida ne’e.” Guarda rede Down to Earth expresa nia sentimentu ksolok.
Nia hatete, liu hosi jogu ida ne’e bele kria amizade no relasaun di’ak entre jogadores Timor-oan sira hotu ho estranjeiru sira mak hala’o servisu iha Austrália.
“Maske ita servisu, ita kontinua mos ho jogu para ajuda ita-nia fíziku, saúde, atu ita bele fit nafatin hodi hasoru servisu ne’ebé loro-loron ita hala’o.”
Nia fiar katak iha jogu ne’ebé sei hala’o tinan oin, sira-nia ekipa sei mantein hatudu joga di’ak atu nafatin sai kampiaun nomos foti kompañia ne’ebé sira servisu ba nia naran.
Nune’e mos jogador ekipa Ceres Farm, Ramos Natalino Valente dehan, “ha’u sente kontente tanba jogu ida ne’e ba Timor-oan hotu-hotu ne’ebé organiza hosi to’os na’in sira. Nia objetivu atu halibur Timor-oan sira no backpacker hosi nasaun seluk.”
Jogu Kopa Ord Valley ne’e halo iha kampu Ord River Magpies Football Club ne’ebé kompete hosi kompañia to’os sira hanesan Down to Earth, Ceres Farm, Bothkamp, Acadia Farm no BTS Packing Shed. Mais ou menus traballador Timor-oan 100 resin mak partisipa iha aktividade jogu refere.
Ba jogu ne’e rasik, kompañia Down to Earth joga dala haat (4), empata ida, lakon ida no manan rua hodi sai kampiaun.
Kopa Ord Valley ne’e hahú iha tinan 2017. Kampiaun 2017 mak Ivanhoe/Barradale, 2018 Ceres Farm, 2019 Bothkamp Australia Farm, 2020 Ceres Farm, 2021 Bothkamp-Pumpkin, 2021 Bothkamp Australia Farm, 2023 no 2024 Ceres Farm no tinan 2025 mak Down to Earth.
