Reportajen David da Costa
Ohin Governu liuhusi Konsellu Ministru (KM) deside Komisáriu Asistente Polísia Afonso dos Santos hanesan komandante jerál PNTL, no nomeia Komisária Asistente Polísia Natércia Eufrazia Soares Martins hanesan Segundu komandante jerál lidera Polísia Nasionál Timor-Leste (PNTL) durante tinan tolu nia laran.
Ministru Interiór (MI) Francisco da Costa Guterres hatete, ohin konsellu ministru deside tiha ona Komisáriu Asistente Polísia Afonso dos Santos hanesan komandante jerál, no nomeia Komisária Asistente Polísia Natércia Eufrazia Soares Martins hanesan Segundu komandante jerál lidera Polísia Nasionál Timor-Leste (PNTL).
No sira na’in-rua nia mandatu ne’e ba tinan tolu, iha estatutu polísia ne’e temi tinan tolu ne’ebé hahú husi dia 27 fulan Marsu tinan 2026, to’o iha 27 fulan Marsu tinan 2029.
Maibé Konsellu Ministru mós ezonera hela Komisária Asistente Polísia Natércia Eufrazia Soares Martins husi Diretora Ezekutiva Servisu Migrasaun no nomeia fali Komisáriu Asistente Polísia Jorge Monteiro hanesan fali, Diretór Ezekutivu Servisu Migrasaun nia
“Sira hanesan ne’e servisu depois tinan rua ho balun iha PNTL haree sira nia avaliasaun tomak hotu, buat barak ita haree katak sira na’in-rua kompleta malu. Ida orsida haree liu ba kestaun operasionais, ida mai para reforma Instituisional, ita haree katak komandante Afonso esperiénsia iha Komandu kleur, tanba ne’e mak haree liu ba kestaun operasionais kestaun fronteira, operasaun espesial, kestaun polisiamentu komunitaria”, dehan Ministru Interiór (MI) Francisco da Costa Guterres ba jornalista sira iha Palásiu Governu, Kuarta 25/03.
Maibé Komisaria Asistente Polísia Natércia Eufrazia Soares Martins nia haree liu bá reforma Instituisional, halo diagnostiku ida ne’ebé mak forte ba iha polísia para atu hatene problema Polísia ninian atu hadi’a buat hotu.
“Tanba ida-ne’e mak ita foti ema na’in-rua ne’ebé mak di’ak para mai reforma totál para hadia di’ak liután Polísia para atu bele hala’o nia servisu di’ak liu tan, tanba ne’e mak komandante jerál mak foka liu ba kestaun operasionais. Enkuantu segundu komandante jerál fó haree liu kedas kestaun administrativu, longuístika, planeamentu, ba halo diagnostiku haree mós kestaun disiplina polísia ninian”, nia esplika.
Nune’e mós haree kestaun inspesaun ujo sasán polísia ninian, halo inspesaun jerál para hodi haree mós polísia la’o loos ka lae, halo tuir ka lae ida ne’e mak fó servisu ba segundu komandante jerál PNTL.
Governante ne’e esplika, sira na’in-rua sei mantein ho diviza Komisáriu Asistente nafatin sei la iha promosaun.
“Tanba depois haree konsellu ministru ami haree hotu ita haree katak sira foin mak sa’e loron hira liu bá, tanba ne’e mak ita husik lai para prosesu ne’e ita la’o neineik tanba iha prosedimentu artigu 47°-48° ne’e dehan komandante jerál ne’e bele mós monu bá iha Komisáriu Asistente ida”, nia dehan
Maibé mos sei haree sira nia servisu iha tinan oin mak halo fali promosaun foun, tanba agora presiza ne’e haree liu bá kestaun re-estruturasaun ba iha estrutura Polísia nian.
“Ita fiar hanesan ne’e, tanba ita fahe ba rua rezolusaun Governu ne’e fó servisu durante fahe servisu ba sira na’in-rua ida haree liu ba kestaun operasionais, ida haree liu ba kestaun reforma Instituisional”, nia subliña.
Governaten ne’e fiar katak, husi sira na’in-rua nia lideransa sei kompleta malu, atu nune’e bele halo reforma estrutural iha instituisaun PNTL nia laran.
