Reportajen David da Costa
Sekjen Jerál Rezisténsia Nasionál Estudante Timor-Leste (RENETIL) hanesan mos Prezidente komisaun lia loos no rekonsilasaun iha Fiji, hato’o nia solidariedade ba Papa Leão XIV hanesan defensór globál ida ba dame hetan atake husi Prezidente Estadus Unidus Amerika (EUA) Donald Trump tanba husu atu hakotu violénsia iha Médiu Oriente.
Sekjen Jerál Organizasaun Rezisténsia Nasionál Estudante Timor-Leste (RENETIL), Joaquim da Fonseca, hatete, eskalasaun iha senariu globál daudaun ne’e la’os de’it hanesan konfrontu entre nasaun sira, maibé hanesan prova ida atu hatudu failansu boot ida iha diplomasia multilaterál.
Tanba ne’e, bainhira potensia boot sira abandona lei internasionál no favorese uza forsa unilateral, orden globál tomak ne’ebé bazeia ba regra hasoru risku boot sira.
Nia dehan, iha krize ida ne’e nia laran, Santu Padre, Papa Leão XIV, mak hamriik nu’udar símbolu ba korajen morál. Maibé ninia pedidu atu hakotu Deluzaun Omnipoténsia nian [Delírio de Omnipotência], no ninia ezijénsia —”To’o ona ho hatudu podér! To’o ona funu!”—mak hanesan liafuan ne’ebé mundu presiza rona agora daudaun ne’e.
Maibé Sekjen RENETIL mos Preokupante tebes haree Papa Leão XIV nu’udar defensór globál ida ba dame hetan atake polítiku maka’as, tanba de’it Santu Padre ezije atu hakotu violénsia.
“Ha’u hamriik iha solidariedade tomak ho Amu-Papa Leão XIV. Nu’udar rai ida ne’ebé hatene loloos kona-ba konflitu ninia todan, Timor-Leste komprende duni Papa Leao XIV nia mensajen ne’e,” dehan Joaquim da Fonseca iha nia Akun ofisiál facebook ne’ebe Neon Metin asesu ohin, Tersa 14/04.
Tanba ne’e, ba nasaun sira seluk importante atu kontinua deklara kata, multilateralizmu la’ós konseitu abstratu ida, maibé hanesan fundasaun absoluta ba soberania Estadu sira hotu nia no seguransa iha palku mundiál.
Forsa loloos la mai hosi hatudu kilat de’it, maibé husi esforsu atu buka diálogu bebeik no ho aten-barani. Mundu presiza rona Santu Padre Papa Leao XIV nia apelu ne’e hodi buka dalan atu fila fali ba multilateralizmu hodi rezolve konflitu no diferensa sira.
