Reportajen Estajiariu Qintiliana Guterres
Palacio Prezidensial ho CVTL sosializa importansia husi fraternidade humana ba funsionairu Cruz Vermelha Timor-Leste (CVTL), iha Palacio iha Aitarak Laran.
Ba jornalista sira, Prezidente CVTL, Madalena Hanjam Soares hateten objetivu husi formasaun ne’e atu hametin kultura, paz, toleransia no inkluziva iha Timor-Leste. Fraternidade humana hanorin Ita katak diferensa relijiaun, lian, ka hanoin politika la’os razaun atu fahe malu, Ita la hanesan Maibe Ita maun-alin.
Nia hatutan mos violensia no diskriminasaun la’os valor Timor nian. Nia husu sidadaun hotu atu sai embaixador dame iha familia no komunidade, “bainhira ita haree ema seluk monu, Ita nia liman mak tenke to’o uluk la’os Ita Nia pergunta kona-ba relijiaun”, Nia hatutan.
Inisiativa ne’e inspira dokumentu kona-ba fraternidade humana paz mundial, asina husi papa Francisco no Imame Al-Azhar iha 4 fevereiru 2019. Prezidensia Republika servisu hamutuk ho CVTL no konfesaun relijiosa Sira nudar parseiru ba implementasaun.
“Fraternidade humana la’os buat foun ba Cruz Vermelha. Prinsipiu CVTL nian liu-liu Imparsialidade, Umanidade, no Universalidade, moris nanis ona iha ami Nia servisu loro-loron. Fraternidade humana mai reforsa tan ami nia konviksaun, bainhira Ema presiza tulun, ami la haree ba nia relijiaun, etnia, ka partidu. Ami haree de’it ba nia sofrimentu nuudar ema”, nia Afirma.
Ferliana Magno Soares hateten, nudar partisipante kontente tanba liu-husi formasaun ida ne’e, bele hatene oinsa halo komunikasaun ho Ita nia kolega sira, no aplika hahalok fraternidade.
“Iha Fraternidade ida ne’e ami CVTL mos aprende bainhira ita halo atendimentu ba ema seluk, la haree ba jeneru, kor no relijiaun,Ita iha atendimentu ba ema hotu-hotu”, dehan nia
